पत्रिका | "टॉपिक एक्सपर्ट" | बुंदेली में ...
Thank you #patrika 🙏
Thank you Dear Reshu Jain 🙏
..................................
टाॅपिक एक्सपर्ट
कां गओ आईटी सेक्टर औ कां गई यूनीवर्सिटी?
- डॉ (सुश्री) शरद सिंह
अपने गौर बब्बा मने, डाॅ. हरीसिंह गौर जू बड़े दूरदर्शी हते। जेई से उन्ने इते इत्तो अच्छो विश्वविद्यालय बनावा दओ। वा बी अपनो गांठ को पइसा लगा के। भला इत्तो कोन कर आए दूसरों के लाने। मनो बे जेई सोचत्ते के अपनो सागर में सबरे पढ़-लिख जाएं। मनो आज जे दसा आए के सरकारी औ निजी सेक्टर के पइसा पे लो कछू अच्छो काम नई हो पा रओ। न जाने कित्ते सालें हो गईं मांगत-मांगत के इते एक महिला यूनीवर्सिटी खुल जाए। जे मांग तो पूरी ने भई, मनो अपनई इते के धनी-धोरी हरन ने डाॅ. हरीसिंह गौर यूनीवर्सिटी को सेन्ट्रल यूनीवर्सिटी बनवा दई। चलो, कोनऊं बात नोंईं। सेंट्रल बन गई, सो बन गई। बनतई साथ हो गओ धमाको। ऊ टेम के कुलपति, जोन ने भर्ती करी हती, बे सोई जेल पौंचाए गए।
सो महिला यूनीवर्सिटी तो अबे लौं ने बन पाई। मनो समै-समै पे आई सेक्टर खोले जाबे की मांग करी गई, ऊपे कोनऊं ने सुध ने लई। बाकी सांची कओ जाए के तो ने उनसे देबो बनत औ ने अपन ओरें से सई से मांगत बनत आए। एक दार बोली औ चिमां गए। जे कोन तरीका आए मांगबे को? जबे प्रधानमंत्री जू खों इते आने रओ सो सबई दोंदरा देत फिरत रै के हमाए गौर बब्बा खों ‘‘भारत रत्न’’ दओ जाए। पीएम के इते से जातई साथ सबरे भूल गए के बे का मांग रए हते? पिछली चुनाव में आई टी सेक्टर के लाने हो-हल्ला करो गओ, जो कछू ने मिलो तो फेर चिमा गए। सो ने तो जनता अपनी मांग को भूले औ न जनप्रतिनिधि गच्चा देबें। ने तो विकास उल्टो चलत भओ दिखाहे।
-------------------------
#डॉसुश्रीशरदसिंह #बुंदेलीलेख #DrMissSharadSingh #पत्रिका #patrika #rajsthanpatrika #topicexpert #टॉपिकएक्सपर्ट
#बुंदेली #सागर #बुंदेलीकॉलम
No comments:
Post a Comment