टॉपिक एक्सपर्ट | पत्रिका | ऐसी हुलास ईसे पैले कभऊं ने देखी | डॉ (सुश्री) शरद सिंह

पत्रिका | टॉपिक एक्सपर्ट | डॉ (सुश्री) शरद सिंह | बुंदेली में

..................................

टाॅपिक एक्सपर्ट

ऐसी हुलास ईसे पैले कभऊं ने देखी

- डॉ (सुश्री) शरद सिंह

            अपने इते रामलला की भौतई किरपा रई। चाए कोनऊं मंदिर होए, उते रामजू ,सीतामैया, लछमन भैया औ बजरंगबली के संगे बिराजे। जो हमाई बात को भरोसो ने होय तो पुरानी मकरोनिया से भोपाल रोड लौं देख लेओ। ने तो जैसीनगर रोड से गढ़पैरा लौं देख लेओ। सबई जांगा रामजू बिराजे दिखाहें। चाए नओ मंदिर होय, चाए पुरानों रामजी के बिना काम नईं चलत। वैसे अपने इते सागर में कछू भौतई पुराने मंदिर सोई आएं। एक तो बड़ा बजार को देव रामबाग मंदिर आए। ऐसई एक मंदिर आए कटरा में मराठी समाज वारों को। और बी मुतके मंदिर आएं जोन की बड़ी सिद्धी ठैरी। सिद्धी होय बी काय नईं? रामलला सबई की मन्नतें पूरी करत आएं। बाकी ई टेम तो ऐसा लग रओ है मनो पूरो सागर रामलला को एक बड़ो सो मंदिर बन गओ होय। 

         काए से के जेई 22 जनवरी खों अजोध्या में रामलला की प्राणप्रतिष्ठा होने। जेई की हुलास में पूरो सागर हिलोरें ले रओ। जेई खुशी में जैन समाज वारे प्रसादी बांट रए, सिख समाज वारे लंगर करा रए, मुस्लिम औ इसाई समाज वारे बधाइयां दे रए। मनो सबई खुशियां मना रए। ऐसो लग रओ के रामलला ने सबई खों भाईचारा की एक डोर में बांध देओ होय। रामधई, ऐसी हुलास तो पैले कभऊं नई देखी। तनक देखों, कोऊं मंदिरन खों सजा रओ, सो कोऊ बुलौव्वा के चाउंर लेके घर-घर जा रओ, तो कोऊ रामजी वारो झंडा हरेक घरे पौंचा रओ। काए से के अपने सागर में अनेकता में एकता सो हमेसई से रई औ अब खुल के दिखा रई। राम करे के जोई माहौल बरहमेस बनो रए औ शहर में ऐसई हुलास छाई रए।

     ------------------------- 

Thank you patrika 🙏

Thank you Dear Reshu Jain 🙏

#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका  #patrika #rajsthanpatrika #सागर  #topicexpert #बुंदेली #बुंदेलीकॉलम