पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
Thank you #patrika 🙏
Thank you Dear Reshu Jain 🙏
..................................
टाॅपिक एक्सपर्ट
बा ठैरी गुलाबी सिटी, जा ठैरी गिलावो सिटी
- डॉ (सुश्री) शरद सिंह
हमाए एक जानबे वारे जयपुर घूम के लौटे आए़ं। वैसे जयपुर हमाओ देखो भव आए, पर ऊ टाईप नोईं जैसे बे घूम के आए। बे जबसे लौटे उतई की रागें-पतूलें दएं फिर रए। एकई बात उनके मों से सुनत-सुनत हमाए कान पक गए के बा गुलाबी सिटी आए। हमने उने समझाओ के सबई खों पतो आए के बा गुलाबी सिटी आए। मनो बे तो उते से पिंकी हो के लौटे, माने 'गुलाबी-गुलाबी' करत फिर रए।
उनकी सुनत-सुनत हमें सोई ताव आ गऔ औ हमने उनसे कई के - बा ठैरी गुलाबी सिटी, सो जा ठैरी गिलावो सिटी। हमाई बात सुन के बे चकराए। पूछन लगे के जे गिलावो सिटी का आए? सो हमने पूछी, 'काय सागर में रे रए औ गिलावो नईं जानत?' उन्ने कई नईं। तब हमने उने समझाई जो आपखों गिलावो मने कीचड़ नई पतो तो अपने इते की शनीचरी, शुक्रवारी, मढ़ियाबिट्ठल नगर, काकागंज औ ने तो दूसरी कुलियां-गलियां देख आओ। गिलावो मचो मिलहे। काय से कऊं राजघाट वारी पाईप फूटी मिलहे तो कऊं नाली-नरदा फूटे मिलहें। बरसात में तो गिलावो मचोई रैत आए, बाकी दिनां सोई गिलावो मचो रैत आए, लीकेज की किरपा से। कऊं ने कऊं, कछू ने कछू फूटो जरूर मिलहे। फेर हमने उने समझाई के आपकी बा गुलाबी सिटी वारन खों सिटी खों गुलाबी करबे के लाने अपनो घर गुलाबी कलर से पुतानो परत आए, पर इते तो बिगैर कछू करै,धरै फोकट में गिलावो मच जात आए। सो, देखी जाए तो उनकी गुलाबी सिटी से अपनी गिलावो सिटी नोनी। औ जो नगरनिगम औ स्मार्ट सिटी वारन खों जे नांव राखबे में कछू शरम आए, तो सिटी की दसा सुधार लैवें।
-------------------------
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment