टॉपिक एक्सपर्ट | पत्रिका | आबे लगी बरात, सो ओटन लगे कपास | डॉ (सुश्री) शरद सिंह

पत्रिका | टॉपिक एक्सपर्ट | डॉ (सुश्री) शरद सिंह | बुंदेली में

..................................

टाॅपिक एक्सपर्ट

आबे लगी बरात, सो ओटन लगे कपास

    - डॉ (सुश्री) शरद सिंह       

         जे अपने इते की कहनात आए के ‘‘आबे लगी बरात, सो ओटन लगे कपास’’। जोन खों नई पतो उनके लाने बताबो जरूरी आए के जबे पैले से तैयारी ने करी जाए औ जबे टेम ने बचो होय तबे काम शुरू करो जाए, तभईं जे कहनात कई जात आए। बाकी अपने इते तो जे हर की साल होत रैत आए। अपन ओरन खों आजादी मिले ई दफा 77 सालें हो जैहें। अपने खुद के शासन-प्रशासन में रैत भए सोई इत्तई सालें भईं जा रईं, पर अपने ई शहर में आज लौं ऐसी परमानेंट व्यवस्था ने हो पाई के हर की साल समै से पैले नाली-नरदा साफ-सुथरा हो जाएं। अपने शहर में मुतके मुहाल ऐसे आएं जिनमें पानी बरसतई साथ नाली को पानी घरे घुसन लगत आए। कछू तो अच्छी-अच्छी कालोनियन में नरदा को पानी बाढ़ घाईं भरन लगत आए। मनो उते पानी के निस्तार के बारे में कोनऊं सोचतई नईयां। पैले तो एक बात के समै के पैले नाली-नरदा की सफाई नई करी जात आए। जो कहूं करी बी जाए तो कुल्ल दिनां नरदा को गंदो गिलावो नरदा के बाहरे उतई डरो रैत आए। जब लोग चिचियान लगत आएं तब कहूं जा के बा गिलावो उते से हटाओ जात आए। औ कहूं ऊसे पैले बरसात आ जाए सो आधो गिलावो फेर के नरदा में पौंच जात आए। 

     बाकी उम्मीद तो जेई करो जाओ चाइए के बरसात चालू होबे के पैले नाली-नरदा की सफाई हो जैहे। ने तो बरसात में तो पतो परई जैहे। काय से के बरात आबे पे सो अपन कपास ओटबे बैठत आएं, सो ऊ कपास के हुन्ना-लत्ता कबे बनहें, जे ने पूछियो।

-----------------------------

Thank you Patrika 🙏

Thank you Dear Reshu Jain 🙏

#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका  #patrika #rajsthanpatrika #सागर  #topicexpert #बुंदेली #बुंदेलीकॉलम