पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
..................................
टाॅपिक एक्सपर्ट
जे दंगल से कबे छुटकारा मिलहे
- डॉ (सुश्री) शरद सिंह
आप ओरें सोच रए हुइयो के जे हमें दंगल की कां से सूझ रई, अबे तो नागपंचमी लो नई आई? आप ओरन को सोचबो सई आए, काए से असली दंगल तो नागपंचमी से चालू होत आए। बाकी रई लड़बे के लाने ताल ठोंकबे वारों की, सो बे ओरें तो कभऊं बी दंगल कर सकत आएं। अबई कछू दिनां पैले मकरोनिया नगरपालिका में दंगल भओ रओ। खुद पार्षद हरें बोले के इते धांधली मची आए। अब उन ओरन ने कई, सो सांची कई हुइए। ई बारे में उनसे ज्यादा को जान सकत आए? मनो हम बा टाईप के दंगल की नईं कै रए। काए से के ऐसे दंगल होत रैने चाइए, ईसे भैया हरों की पोल-पट्टी खुलत रैत आए। सो बा दंगल तो ठीक आए।
बाकी हम तो ऊ वारे दंगल की कै रए, जोन आए दिनां सड़कों पे होत रैत आए। कभऊं गैंया-गैंया लड़न लगत आएं, सो कभऊं बैलवा-बैलवा लड़न लगत आएं। उने का परी के उनके बा दंगल से कोनऊं के हाथ-गोड़े टूट रए के, ट्रैफिक जाम भओ जा रओ। औ अपने इते के फंकाई मास्टर “पशु विचरण मुक्त” रोडन की फंकाई देत रैत आएं। सबरी रोडें जरूर मिटी डरी आएं औ जे छुट्टा-छोर ढोरन को दंगल जारी आए। अरे, जो इते जे छुट्टा ढोरन खों पकरबे वारे ने होंय, सो बाहरे से किराए पे बुला लेओ। बा, तला की सफाई के लाने औ राजघाट के पानी चढ़ाबे के लाने तो मुतकी बेर किराए की मशीनें मंगा चुके, ई दार कछू ढोर पकरबे वारे बुला लेओ। काय सई कई के नईं?
-----------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment