पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
..................................
टाॅपिक एक्सपर्ट
कोनऊं तो टारो जे बसकारे की बिपदा
- डॉ (सुश्री) शरद सिंह
पानी ने बरसे सो सल्ल, औ जो बरसे सो सल्ल। इते तो मनो सल्लई- सल्ल में जिनगी कटी जा रई। तनक पानी बरसत तो लगत आए के जा बसकारा कैसे कटहे? खुदी डरीं रोडन पे गढ़ा औ गिलावो मचो। चाए पैदल निगों, चाए दुपइया पे, फिसल के मों के बल गिरबे की गारंटी। अबे परों, हम निंगत जा रए हते, के एक मोड़ी स्कूटी से हमाए बाजू से कढ़ी। बिचारी ने हमाए लाने खूब बचाओ के हम पे छींटा-छूंटी ने परे। बाकी बा बिचारी दस-पंद्रा कदम पौंची हुइए के ऊकी स्कूटी को चका एक गढ़ा में जा फंसों। बा मों के बल गिरी। ऊको उठाबे के लाने हम ऊके लिंगे पौंचे, संगे दो-चार जने औ आ गए। ऊ मोड़ी के हेलमेट पे गिलावो छप गओ रओ, सो बा कछू देख ने पा रई हती। कैसऊ ने कैसऊ ऊने अपनो हेलमेट उतारो, तब कऊं बा देख पाई। एक के घरे से पानी मंगा के ऊके हुन्ना-लत्ता औ हेलमेट धुबाए। जे सो हमाई देखी आए, आप ओरें सोई जे रोजीना देख रए हुइए। पर जाने प्रशासन खों जे काय नईं दिखात। जो दिखात होतो तो सबरे नरदा साफ रैते औ पंद्रा मिनट के झला में रोडें नदियां घांई ने भर जातीं।
बसकारे से पैले जो तनक सी तैयारी कर लई जाती तो जे बिपदा ने परती। अबई बसकारो कढ़हे सो फेर जे बिपदा कोनऊं खो याद ने रैहे। जैसे राजा ऊंसईं परजा। दोई बसकारे खों कोसत रैहें, बाकी बिपदा ने टारहें। भैया हरों! रोडन पे गढ़ा, रोडें खोद के मचाओ गओ गिलावो औ पुरे-पुराए नरदा - कोनऊं तो टारो जे बसकारे की बिपदा।
-----------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment