पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
..................................
टाॅपिक एक्सपर्ट
खादी पहनबे के लाभई लाभ आएं
- डॉ (सुश्री) शरद सिंह
खादी पहनबे के भौत से फायदे आएं। सबसे बड़ो फायदो तो जे के ईसे मुतके लोगन खों रोजगार मिलत आए। ने तो सिंथेटिक कपड़ा बनाए में लोग कम औ मशीनें ज्यादा काम में आऊत आएं। जेई से महात्मा गांधी ने कई रई के स्वदेशी मने खादी पैन्हों। बाकी ऊंसई बी देखो जाए तो खादी पहनबे के फायदई फायदा आएं। पैलो तो जे के जे कपड़ा गर्मी औ सर्दी दोई मौसम में अच्छे होत आएं। मने गर्मी में जे पसीनों सोखत आएं औ सर्दी में ठंड नई लगन देत आएं। फेर सिंथेटिक कपड़ा जित्ते धुलत, उत्तई फीके परत जात आएं। जबके खादी होय चाए हैण्डलूम जे जित्ते धुलत, उत्ते नोने होत जात आएं। खादी से कभऊं कोनऊं स्किन प्राब्लम नईं होत। जे जल्दी आग नईं पकरत। औ एक फायदो जे औ आए के जो कपड़ा पुरानो हो जाए सो ऊको कोनऊं काम में लाओ जा सकत आए। ईको पोंछा लो बनाओ जा सकत आए। फेर आजकाल तो खादी फैशन में आ गई। खुद परधान मंत्री जू ने नारा दओ के "खादी राष्ट्र के लिए, खादी फैशन के लिए"। अब खादी के कपड़ा बी सुंदर बनन लगे आएं। सो आप ओरें सोई खादी पैन्हों औ स्वदेशी फैशनेबल बनो। काय से के खादी कभऊं आउटडेटेड ने हुइए।
मनो अपने सागर में खादी को बढ़ाबे के लाने शासन खों सोई ध्यान देने परहे। पैले इते मृगनयनी को आउटलेट रओ, सो बा जाने कां हिरा गओ? मनो खादी भंडार आए, उने अपनी रेंज बढ़ाओ चाइए। बच्चा औ लुगवा हरों के तो मुतके कपड़ा उते आएं, पर उते लुगइयों औ बिटियन के लाने धुतिया, सलूखा औ सलवार सूट के कपड़ा कम आएं। सो जे सब बढ़ाओ जाओ चाइए। तभई तो अपनो सागर ‘खादी सागर’ बनहे।
-----------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment