पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
..................................
टाॅपिक एक्सपर्ट
बच के रहियो जड़कारो आ गओ
- डॉ (सुश्री) शरद सिंह
लेओ आ गओ जड़कारो! तनक देर से सई मगर आ गओ। अबे तनक समै पैले जां आईसक्रीम की ठिलियां दिखात्तीं उते अब गरम भुनत भईं मोंमफली की ठिलियां दिखान लगीं। कोल्डड्रिंक की जांगा चाय-कॉफी पोसान लगी। ऊमें सोंठ औ अदरक वारी चाय की तो कैनई का। कोऊं-कोऊं ने तो काढ़ा पीबो शुरू कर दओ। जेई तो होत आए मौसम बदले में। घरे गरम हुन्ना-कपड़ा निकर आए। जोन अबे लौं चदरा ओढ़त्ते, बे अब चदरा के संगे कंबरा साटन लगे। पल्लियां सोई निकर आईं। जे सब जरूरी बी आए। काए से के जड़कारे से बच के रैबो बी जरूरी आए। जा जो जड़कारो आए, बा कैबे खों तो सेहत बनाबे वारो मोसम कहाऊत आए, मनो जो ठंडी लग जाए तो बनी बनाई सेहत बिगर सकत आए।
अब सोचबे की बात जे आए के इते ठंड बढ़ी जा रई औ ऊंसई ब्याओ को सीजन चल रओ। ब्याओ में जाबे वारे सबई सज-धज के जाउत आएं। मनो, जे ठंडी के चलत सब कचरा हो जात आए। आपई सोंचो एक अच्छी नई डिरेेस बनवाई औ ऊपे कोट-सूटर पैन्हने पर जाए सो कचरा होबो कहाओ। भैया हरें सो फेर बी कोट-सूट पैन्ह लेत आएं। बच्चन खों डांट-डूंट के गरम कपड़ा पैन्हा दए जित आएं। बब्बा, बऊ हरें तो ऊंसई ठंडी से डरात आएं। मनो हमाई बैनें, भौजियां, यां तक लौं आंटी जू हरे खुलो सो बिलाउज औ मच्छरदानी सी पतरी धुतिया पैन्ह के फिरत रैत आएं। ऊ टेम पे तो कछू पतो नईं परत, बाकी अगली दिनां कऊं हात-गोड़े पिरात आएं, तो कऊं बुखार चढ़ आऊत आए। सो, भौजी हरों, बैन हरों खो अपनो खयाल राखियो। ऐसो आए के फैशन सोई मोसम के टाईप को करो जाए सो अच्छो बी लगत औ सेफ बी रैत। सो खूब ब्याओ में जाइओ, धूम मचाइओ मनो जड़कारे से बच के रहियो।
-------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #Patrika #rajasthanpatrika #सागर #topicexpert #बुंदेली #बुंदेलीकॉलम
No comments:
Post a Comment