पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
..................................
टाॅपिक एक्सपर्ट
ठंडे कंडा में बाटियां सिंकवा दईं
- डॉ (सुश्री) शरद सिंह
जा हैडिंग पढ़ के आप ओरें सोच रए हुइयो के जा तो बर्रायान लगीं। भला ऐसो कऊं होत है के ठंडे कंडा में बाटियां सेंकी जाएं। बे तो ऊंसई ने सिंकहें। अरे, सेंकबे के लाने आगी तो होनी चाइए। जबे कंडा बर के अंगरा से बन जाए आएं, तभईं ऊमें बाटियां धरी जात हैं। कंडा बरो नईं औ बाटियां सिंकबे की बात होन लगी। भला जे का बात भई? सो, आप ओरन की जा सोच सई आए। हमें सोई पतो के बाटियां कैसे बनाई जात आएं। पर करो का जाए ई टेम पे तो अपन ओरन के संगे कछू ऐसई हो रओ। जो झूठी लगे तो ने मानियो , पर हम तो कै के रैबी। तनक याद करो आप ओरें के कई तो जेई गई रई के जो टाटा की पानी की लाइनें बिछहें तो 24 घंटा पानी मिलहे। बड़ी खुसी भई ती जा सुन के। बे ओंरे तो भौतई खुस भए रए जोन के इते पानी स्टोर करबे की जांगा नईयां। सो, 24 घंटा पानी की कै के पूरी सड़कें लौं खोद डारी। ईपे बी सबने गम्म खा लओ के जो कछू हो रओ, होन देओ बाकी बाद में 24 घंटा पानी तो मिलहे। लेन डल गई, मीटर लग गए और जो साल भरे पानी ने मिलो फेर बी बिल थमा दए गए, ऊपे सल्ल जे के अब जब पूछो गओ के 24 घंटा पानी कबे मिलहे तो जबाव दओ गओ के राजघाट की ऊंचाई ने बढ़ाई गई सो 24 घंटा पानी नई दओ जा सकत आए। आप आई ओरें बताओ के जेई बात पैले बता दई जाती के लेन तो डाल रए मनो पूरो पानी तभई मिलहे जबें राजघाट ऊंचो कर दओ जैहे। सो, सिंक गई ने ठंडा कंडा में बाटियां!
-------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment