टॉपिक एक्सपर्ट | नए साल में सब अच्छो करियो | डॉ (सुश्री) शरद सिंह | पत्रिका | बुंदेली कॉलम
टाॅपिक एक्सपर्ट
नए साल में सब अच्छो करियो
- डॉ (सुश्री) शरद सिंह
लेओ नओ साल बी लग गओ। सई में समै ऐसे भगत आए मनों झरना के लिंगे नदी को पानी। कोऊ रोक नईं सकत ऊको। मनो पानी को तो फेर बी बंधान बांध के तनक रोको जा सकत आए, हवा को कोनऊं सिलेंडर में भर के राखो जा सकत आए, आगी खों राख तरे दबा के रात से भुनसारे लौं धरो जा सकत आए, मनो समै कैसऊं बी रोको नईं जा सकत। देख लेओ के कैसे 2025 देखत-देखत कढ़़ गओ औ 2026 आ गओ। परकी साल हमने मुतकी गलतियां करी हैं, पर अब ई साल बे गलती दोहराने नइयां। अब आप ओरें सोच रए हुइयो के अपन ने कोन सी गलती करी? सो चलो, एकाद गलती गिन लई जाए।
का आए के पर साल कछु भैया, बैन ने अपने सागर तला खों सुसाइड प्वाइंट बना लओ। घरे कछु रार भई तो तला पौंचे औ लगा दई कुद्दी। कछु जनों खों उते ठाढ़े भओ ने बचा लओ औ कछू निपट गए। ई से भओ का के उनकी जिनगी की सल्ल तो ने निपटी मनो कारीडोर की रेलिंग पे जालियां लगानी पड़ रईं। ईसे जां कारीडोर औ तला की ब्यूटी बिगरी जा रई, उतई बेफालतू के पइसा खरच हो रए। सो, जिनगी में कछू सल्ल बिंधे तो फालतू कुद्दी ने मारियो। आपस में बतकाव करके मामलो सुलटा लइयो। जे बात गांठ बांध लेओ के अच्छी सोच राखे से सारी बिपदा कट जात है। अपनी सेहत को सोई खयाल राखियो। घर के चाए बुड्ढा होंए के बच्चा हरें, औ चाए लुगवा-लुगाइयां सबको ध्यान राखने है। जो थोड़ी में कई जाए तो जेई आए के नए साल में सब अच्छो करियो! औ जो अच्छो ने करे ऊको सुदार बी दइयो। काए से के गलत को साथ देबे वारो सोई गलत कहाऊत आए।
---------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment