टॉपिक एक्सपर्ट | समधी की मूंछ जैसे रोबो की पूंछ, रोबो पाल लेओ | डॉ (सुश्री) शरद सिंह | पत्रिका | बुंदेली कॉलम

टॉपिक एक्सपर्ट | समधी की मूंछ जैसे रोबो की पूंछ, रोबो पाल लेओ | डॉ (सुश्री) शरद सिंह | पत्रिका | बुंदेली कॉलम

टाॅपिक एक्सपर्ट

समधी की मूंछ जैसे रोबो की पूंछ, रोबो पाल लेओ

- डॉ (सुश्री) शरद सिंह

ई टेम पे दो टाईप को सीजन चल रओ। एक तो ब्याओ को सीजन औ दूसरो इंडिया एआई इम्पैक्ट समिट 2026 को। मनो पैलो वारो सबई जांगा चल रऔ, उतई दूसरो अकेलो दिल्ली में चल रओ। जो बुंदेली ब्याओ औ समिट में पैदा भई बेफालतू की गिचड़ को। सोची जाए सो दोई में एक चीज की समानता आए। बो आए कुत्ता। अब आप सोचहो के जे कुत्ता कां से आ गओ? सो, तनक याद कर लइयो, औ जो याद ने आए तो बड़े-बूढ़न से पूछ लइयो के ब्याओ के टेम पे कुत्ता की गारी कैसी गाई जात्ती। बाकी हम सोई याद करा दे रए के लड़की वारे गारी गा के लड़का वारों की कैसी मजा लेत्ते-

कुत्ता पाल लेओ….

ओ मोरे जजमान, कुत्ता पाल लेओ …

समधी मूंछ जैसे कुत्ता की पूंछ

कुत्ता पाल लेओ….

समधन की छींट जैसे कुत्ता की पीठ

कुत्ता पाल लेओ….

देउरा को पान जैसे कुत्ता को कान

कुत्ता पाल लेओ….

      जा गारी सुन के सबरे मजो लेउत्ते। कोनऊं बुरौ नईं मानत्तो। मनो दिल्ली के एआई इम्पैक्ट समिट में एक ठइयां देसी रोबो कुत्ता दिखाओ गओ। बा नाच बी सकत आए। अब आपई सोचो के रोबो कुत्ता पालबे से एकई दार खर्चा होने। ने ऊको ख्वाने औ ने ऊको संझा-संकारे पौटी कराने। कोनऊं सुजी लगवाए की बी जरूरत नईं। सो, हमाओ तो मन कर रओ के हम कोनऊं के ब्याओ में जाएं औ गारी गाएं के -

रोबो पाल लेओ

ओ मोरे जजमान,रोबो पाल लेओ!

समधी की मूंछ जैसे रोबो की पूंछ

रोबो पाल लेओ!

    बाकी कछू हरें बा रोबो कुत्ता की नसल के पांछू परे हैं, के बा चीन को आए। मनो आपई बताओ के का अपने इते जर्मन शेफर्ड औ लेबराडोर नईं पालो जात का? अरे जोन ने पालो, कुत्ता तो बोई को कहानो। सो, गिचड़ छोड़ो औ रोबो-कुत्ता पाल लेओ।

---------------------

Thank you Patrika 🙏

Thank you Dear Reshu Jain 🙏

#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका  #patrika #rajsthanpatrika #सागर  #topicexpert #बुंदेली #बुंदेलीकॉलम