आज पत्रिका में "टॉपिक एक्सपर्ट" में बुंदेली में मेरे विचार क्षेत्र की एक समस्या पर....
Thank you #patrika 🙏
Thank you Dear Reshu Jain 🙏
..................................
टॉपिक एक्सपर्ट
बे उते बनात जात, इते मिटत जात
- डॉ (सुश्री) शरद सिंह
एक मंत्री जी ने बड़ी नोनी बात कई के सीसी रोड के आंगू डामर रोड टिकाऊं नई रैत। जेई से कांट्रेक्टर हरें डामर रोड बनाओ चात आएं, जी से जल्दी-जल्दी ठेका मिलत रए। अब उन्ने जे काय कई, कोन के लाने कई? ई से अपन खों का? बाकी बात कई सोला आना टना-टन्न।
चलो, सीसी रोड की एक सांची किसां सुन लेओ।। का भओ के एक बड्डे भोपाल गए। जे ऊ टेम की बात आए, जबे अपने सागरे में सीसी रोड कऊं ने हती। सो, बड्डे भोपाल पौंचें। उते उन्ने देखो के कछू जने नई बनी सीसी रोड पे खचां करत जा रए हते। बड्डे ने देखी सो उने कछू समझ ने परी। उन्ने अपने संगवारे से पूछी,"काय भैया, जे रोड खों केक घांई काट के, का रोड की हैप्पी बर्थडे मना रए?"
"तुम आओ पगला! जे हैप्पी बर्थडे मनाबे के लाने नोईं काट रए। जे जांच रए के कित्ते इंची सीमेंट ईमें डारो गओ? तुमें इत्तो नई पतो?" संगवारो बड्डे को मजाक उड़ात भओ बोलो।
"अब हमें का पतो! हमाए इते तो रोडन की हैप्पी बर्थडे नोई राम नाम सत्त होत रैत आए।" बड्डे खिसिया के बोले।
मनो ऊ टेम से ई टेम लों कछू खास नईं बदलो। अपने इते सोई सीसी रोड बनवा दई गई आएं, बाकी हाल जे रैत आए के बे उते बनात जात, इते मिटत जात। जे कोन सी टेक्नीक आए? ईपे सोई मंत्री जी को कछू कओ चाइए। कछू पता तो परे! ताकि जोन टेम पे गढ़ा में गिरें, या फेर ठोकर घले सो अकड़ के कै सकें के ई टेक्नीक के गढ़ा में हाथ-गोड़े तुड़ा के आ रए।
-----------------
#डॉसुश्रीशरदसिंह #बुंदेलीलेख #DrMissSharadSingh #पत्रिका #patrika #rajsthanpatrika #topicexpert #टॉपिकएक्सपर्ट
#पत्रिकान्यूज़
No comments:
Post a Comment