पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
..................................
टाॅपिक एक्सपर्ट
स्पीड ब्रेकरन की कोनऊं खों सुध नईयां
- डॉ (सुश्री) शरद सिंह
कोनऊं गिन के बता सकत का, के अपने शहर में कित्ते स्पीडब्रेकर आएं? नईं, जे कोनऊं नईं बता सकत। काय से के शहर भरे में इत्ते स्पीड ब्रेकर आएं के उनको गिनबे के लाने अलग से गिनबे वारे लगाने परहें। बे ब्रेकर सोई किसम-किसम के आएं। एक स्कूल तरफी एक मुंडी कट स्पीड ब्रेकर आए। मने स्पीडब्रेकर के ऊपरे जो कूबड़ निकरो रैत आए ऊको तनक सो काट दओ गओ आए। सो ईंसे का है के, औ अजीब सो दचका लगत आए। एक ठैरो बजरिया की तरफी। बा में दो ठईयां कूबड़ आएं। जे सोई होत के, रोड काट के पाईप डारी ओ ऊपे ब्रेकर बनवा दओ। ऊंसई अपने इते तो तनक रसूखवारो जो होय सो अपने दोरे एक ठईंयां स्पीड ब्रेकर बनवा लेत आए। मने ऐसो कोनऊं नियम नोंई के मन आए कऊं बी स्पीड ब्रेकर बना के बैठ गए। नियम तो जे आए के कऊं बी स्पीड ब्रेकर बनाबे के पैले नगरीय निकाय मने नगरपालिका से, ने तो नगर निगम से परमीशन लेनी परत आए। पर इते को ले रओ? स्पीड ब्रेकर होत आएं राह चलत वारन की सुरक्षा के लाने, मने अपने इते तो मुसीबत बने ठाड़े। ब्रेकर बनाबे के सोई नियम कायदा होत आएं। स्पीड बंप के दोई तरफी इत्ती ढलान दई जात आए रीढ़ की हड्डी पे दचका ने घले। मनो इते तो ठूंढ़ा से ब्रेकर बना दए जात आएं। के जो ध्यान ने जाए सो फुट भर उछरबो पक्को। ऊपे, ब्रेकर पे कोनऊं इंडीकटर नईं रैत। बिना परमीशन के औ गलत बने ब्रेकर तोड़बे को अभियान चलाओ जाने चाइए। ने तो शहर में कम्मर पिराबे की बिमारी बढ़त जैहे औ दुर्घटना होत रैहे।
-------------------------
Thank you #patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment