टॉपिक एक्सपर्ट | पत्रिका | ई तपे में अपनो खयाल राखियो | डॉ (सुश्री) शरद सिंह

पत्रिका | टॉपिक एक्सपर्ट | डॉ (सुश्री) शरद सिंह | बुंदेली में

..................................

टाॅपिक एक्सपर्ट

ई तपे में अपनो खयाल राखियो

    - डॉ (सुश्री) शरद सिंह

      दिल्ली में पैली बार टेम्परेचर 52.9 डिग्री का भओ, के सबरे सनाका खा गए। खाओ बी चाइए, काय से के दिल्ली दूर नोंई। अबकी बेर उते 52 पार हो गओ तो अगली बेर अपने इते हो जैहे। अपन खों रोडें चाऊने, पेड़ थोड़ी। अपन खों प्लाटें चाऊने जंगल थोड़ी। मगर तनक सोचियो के जो पेड़ ने हुइएं, जंगल ने हुइएं सो पानी कब लों रैहे? उन ऐरन के बारे में तो ऊंसई कोनऊं सोचत, जोन के घरे एसी नईयां, कूलर नईयां। औ मुतके ऐसे बी आएं जोन के पास घरई नईयां। मनो अब टेम आ गओ आए के एसी, कूलर वारे सोई सोचबो शुरू कर दें। काय से के जो पानी ने रैहे सो बिजली कां से बनहे? औ बिना बिजली के एसी, कूलर कैसे चलहें? बाकी सांची बात तो जे आए के जोन ने पेड़ काटे, औ कटवाए बे तो दोषी आएं, पर संगे बे सबरे दोषी ठैरे जोन ने पेड़ कटत देखे औ चीं ने बोले। अब जो तपा में रहाई ने पड़ रई सो पेड़ याद आ रये।

    मनो अबे लगाए पेड़ तुरतईं तो छायरी ने दैहें, सो अबे तो सबसे पैले जेई जरूरी आए के ई तपे में अपनो खयाल राखो। आम को पना पियो, मुतको पानी पियो, मूंड़ पे गमछा डारो। औ जो जरूरी ने होय तो बाहरे ने फिरो। चिरैया हरों के लाने सोई दाना-पानी देओ। बे सोई जीव आएं। संगे, अगली बेरा जो अपन ओरन खों 52 डिग्री लौं नई जाने, तो अभईं से पीबे को पानी बचाओ, तला औ कुआ साफ राखो औ जो पानी बरसे, सो सबसे पैले पेड़ें लगाओ। 

-----------------------------

Thank you Patrika 🙏

Thank you Dear Reshu Jain 🙏

#टॉपिकएक्सपर्ट  #डॉसुश्रीशरदसिंह  #DrMissSharadSingh  #पत्रिका  #Patrika  #rajsthanpatrika  #सागर  #topicexpert  #बुंदेली #बुंदेलीकॉलम