टाॅपिक एक्सपर्ट
जो कोनऊं डाऊट होए तो फोरलेन पे फिर आइयो, पता पर जैहे
- डॉ (सुश्री) शरद सिंह
दो दिनां पैले रानगिर वारी माता हरसिद्धि देवी जू को बुलावा आओ औ हम चल परे उनके दरसन के लाने। बा कई जात है ने के जबे माता बुलात आएं, तभईं उनके दरबार में पौंचो जा सकत आए। वैसे जे बात सबई देवी-देवतन के लाने कई जात आए, चाए बे कोनऊं धरम के होंए। बाकी खास बात जो हम बताबो चात आएं, जे नईयां के माता ने हमाए लाने बुलावा भेजो। खास बात सो ईके बाद सुरू होत आए। का है के हम ओरन ने करी एक गाड़ी औ निकर परे। मकरोनिया से नरसिंगपुर रोड पकरी। संझा की बिरियां हती औ झिमिर-झिमिर पानी बरस रओ तो। अबे ऊ जांगा लौ पौंचे जां मुतके बड्डे-बड्डे कालेज ठाड़ें, औ हम ओरन खों पैलो धचका लगो। हम ओरन ने गाड़ी चलाबे वारे खों गरियाओ। बा कैन लगो के “हम का करें रोड पे गड्ढा हो गए हैं, कित्तऊ बचाओ धचका तो लगहेई।”
कछू नईं, हमने सोची के जे तो लोहरी रोड आए, अभईं फोर लेन पे पौंच के सरसरान लगबी। उते की रोड सो साजी हुइए। अखीर ऊको साजी रखबे के लाने अपन ओरें मुतको टोल टैक्स भरत आएं। मनों जे का? जैसेई फोर लेन पे पौंचे ऊंसईं भरका घांईं गोल-गोल गड्ढन ने हम ओरन को वेलकम करो। हमें याद आई के पर की साल जेई मोसम में हम फोर लेन से झांसी गए रए। संकारे मों अंदेरे निकरे हते औ रात लौं वापसी हती। मनो ऊ रोड पे गड्ढा औ गइयां इत्ती मिलीं के ने पूछो। अब बोई दसा ई रोड पे मिल रई हती। पर गड्ढा के बारे में कोनऊं खों फिकर नईं औ गइयां तो टोल नाका के इते बीच रोड पे पसरी मिलीं। बा दसा देख के हमें लगो की अपन कित्ते महान आएं जोन टैक्स तो भरत रैत आएं मानों साजी रोड के लाने मों ने खोल पाऊत आएं। है ने सई बात? जो कोनऊं डाऊट होए तो फोरलेन पे फिर आइयो, सई से पता पर जैहे।
-----------------------------
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #बुंदेलीकॉलम #patrika #rajsthanpatrika #topicexpert #बुंदेली
No comments:
Post a Comment