टॉपिक एक्सपर्ट | औ कित्ती मौतन के बाद जा स्पीड पे लगाम लगहे? | डॉ (सुश्री) शरद सिंह | पत्रिका | बुंदेली कॉलम

टॉपिक एक्सपर्ट | औ कित्ती मौतन के बाद जा स्पीड पे लगाम लगहे? | डॉ (सुश्री) शरद सिंह | पत्रिका | बुंदेली कॉलम

टाॅपिक एक्सपर्ट 

औ कित्ती मौतन के बाद जा स्पीड पे लगाम लगहे?

- डॉ (सुश्री) शरद सिंह

हात में गाड़ी आई नईं के उन्ने गदर मचाई - जेई हो रओ आजकाल अपने सागर में। जेई से आए दिनां कोऊ ने कोऊ भैकंर एक्सीडेंट की खबर सुनबे खों मिल रई। मनो चेत कोऊं नईं रओ। चाए सहर के बायरे होए, चाए भीतरे, ऐसी-ऐसी टक्करें भईं आएं के उनकी सोंस के ई जी सो कंप जात आए। छोटू अहिरवार नांव को एक ज्वान मोड़ा शायगढ़ से इते आओ रओ कोनऊं परीच्छा देबे के लाने। बा बिचारो गोपालगंज में रोड के कनारे-कनारे पैदल जा रओ हतो। इत्ते में एक बोलेरो आई औ ऊने ऊको इत्ती जोर से ठोंकी के बा बिचारो मोड़ा 5 फीट लौं उछल के गिरो। अब आपई सोंसो के ऊकी का दसा भई हुइए? जा टक्कर सीसीटीवी में पूरी दिखानी। बाकी जो आप ओरन खों याद होय सो कछू समै पैले जेई गोपालगंज के काली तिराहा पे एक स्याने  बुजुर्ग खों एक कार वारे ने ऐसी टक्कर मारी रई के बे कार के नैंचे फंस के 50 फीट लौं घसटत चले गए रए। उते सदर में सेना के दो ज्वानों खों एक गाड़ी ने भौतईं बुरी तरां से ठोंक दओ। सिविल लेन से मकरोनिया रोड पे सो आए दिन गाड़ियन से कोऊं ने कोऊं ठुंकत रैत आए। मनो स्पीड पे तो कोनऊं को लगाम नइयां। जो जे नए उमर के मोड़ा ठैरे उनखों तो कोनऊं की जान की परवा ई नइयां। चाए दो पहिया होय, चाए चार पहिया बे तो धौंकत रैंत आएं। उने पतो आए के बे कोऊं खों ठोंके उनके दद्दा सो उने बचाई लैहें।

     सहर के बायरे देखो सो फोर लेन मने NH-44 पे बम डिस्पोजल स्क्वॉड की गाड़ी औ एक कंटेनर में भिड़ंत हो गई, जीमें 4 ज्वान शहीद हो गए औ एक अस्पताल में डरो। बाकी फोर लेन की तो जो है सो है, इते सहर के भीतरे गाड़ियन की स्पीड पे लगाम काए नईं लग पा रई? औ कित्ती मौतन के बाद लगाम लगहे?

---------------------

Thank you Patrika 🙏

Thank you Dear Reshu Jain 🙏

#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका  #patrika #rajsthanpatrika #सागर  #topicexpert #बुंदेली #बुंदेलीकॉलम