टाॅपिक एक्सपर्ट
इते माता की धूम मची, औ उते आए हमाए नए रैवासी
- डॉ (सुश्री) शरद सिंह
“ऊंची पहरिया पे माई को ठिकानो, कैसे मिलन खों आऊं मोरी मैया…” ऐसईं भक्तें गाई जात आएं देवी मैया के दरबार में पौंचबे के लाने। मनों जे तो सोची जाए के साल में नौ-नौ दिनां के लाने माता खुदई आ जात आएं दरसन देबे के लाने। हम नौरातों की कै रए। सो, आजकाल नौरातों में माता के मुतके दरबार सजे। इनमें से कछू तो डेढ़-दो सौ बरस से सजते आ रए। बड़ा बजार, पुरव्याऊ, सदर सबई कऊं एक से बढ़ के एक छबि आए माता की। औ नोनी बात जे के सबई जात-धरम के लोग ईमें मिल के सहयोग करत आएं। मनो ई दार नओ जे भओ आए के दो नए रैवासी अपने इते आ गए आएं।
हऔ, अपने इते वीरांगना रानी दुर्गावती टाइगर रिजर्व (नौरादेही) में दो चीतां नए निवासी बन के पधारे आएं। जीमें एक को नांव वियोम औ दूसरे को नीरा आए। जो दोई की जोड़ी बन जैहे तो अपने इते इन ओरन के लल्ला-लल्ली हुइएं। वैसे कओ जात आए के नर चीते के लाने जेई कछू 39 से 78 वर्ग किलोमीटर को घूमत को एरिया लगत आए जोन को ऊकी ‘टेरिटरी’ कओ जात आए। उतई मादा चीतां के लाने 800 से 1,000 वर्ग किलोमीटर या ऊंसे भी ज्यादा को इलाको लगत आए। मनो जो अपनों टाइगर रिज़र्व सागर, दमोए और नरसिंहपुर जिला लौं फैलो आए। सो, ईको एरिया जेई कछू 2,339 वर्ग किलोमीटर को आए। मनो ईको डर नोंई के संकारे दोरे की कुंडी खोली औ चीता के दरसन मिल गए। साल भरे बाद से बे उतई नौरादेही में देखबे खों मिलहें। तब लौं माई के शेर खों निहारो औ बोलो, जै माता दी!
----------------
Thank You Patrika 🙏
Thank you Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #बुंदेलीकॉलम #patrika #rajsthanpatrika #topicexpert #बुंदेली
No comments:
Post a Comment