पत्रिका | टॉपिक एक्सपर्ट | डॉ (सुश्री) शरद सिंह | बुंदेली | Thank you #patrika 🙏
Thank you Dear Reshu Jain 🙏
..................................
टाॅपिक एक्सपर्ट
ऊंसई-ऊंसई में कढ़ गओ पूरो साल
- डॉ (सुश्री) शरद सिंह
काय कछू सोची के नए साल में का कर हो?
हमने एक जने से जे सवाल पूछ लओ। बे बमक गए औ कैन लगे के पैले आबे वाली साल को वेलकम तो कर लेन देओ फेर पूछियो के का करने। हमने कई के अरे, भैया नए साल के लाने पैलई से कछू तै करो तब ने कछू नओ कर पाहो। सो बे कैन लगे के इते पुरानओ कोन ने पूरो कर लओ जो हम नओ करबे की सोचें। बात सई कई उन्ने। पूरो साल निकर गओ किचर-किचर करत, मनो सबरी दसा ऊंसई की ऊंसई डरी दिखात आए। तला ऊंसई, सड़कों पे धूरा ऊंसई, ढीले परे काम ऊंसई। छुट्टा ढोर घूम रए ऊंसई। ट्रेफिक की दीन दसा ऊंसई। चाए कोनऊं मार्केट फिर आओ, ढंग से कढ़बे की जांगा ने मिलहे। तनकई में तो कोनऊं गाड़ीवारो धकिया जाए, सो कओ कोनऊं बैलवा आ के उचका जाए। कचरा की तो पूछियोई नईं। चाए गली होय, चाए सड़क, चाए पुल होय, चाए बा नओ कारीडोर सबई कऊं गुटखा की खाली पाऊंचें औ पन्नियां डरी रैत आएं। अब कचरा गाड़ी सो चल रई, मनो ऊंसे का होत आए? इते तो गुटखा खाबे वारन खों दिन भरे फिरने। उन्ने जे थोड़ी सीखो के खाली पाऊंचें डस्टबिन में डारो चाइए। बाकी गुटखा सो ऊंसई नई खाओ चाइए। बा कोनऊं अच्छी चीज नोंई।
मनो अपन ओरन के लाने औ अपनी सिटी के लाने का अच्छो औ का बुरौ आए, जे लिखत-लिखत पूरी साल कढ़ गई। मनो अब नई साल आई जा रई, ऊमें कछू अच्छो कर लओ जाए। है के नईं ! सो, तै कर लेओ के नओ साल खों हम ऊंसई-ऊंसई ने कढ़न देबी।
-------------------------
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
