पत्रिका | टॉपिक एक्सपर्ट | बुंदेली में
टॉपिक एक्सपर्ट
मुतके स्कूलन की पोलें खुल गईं
- डॉ (सुश्री) शरद सिंह
अब आप ओरें सोच रए हुइए के ईमें नओ का? स्कूलन की पोलें तो बरहमेस, खुलत रैत आएं। अबई जेई साल में पता परी के गांव के टीचर हरें अपने बदले पढ़ाबे के लाने भाड़े के टीचर राख रए। बा पोल खुलतई साथ पूरो प्रसासन तरे-ऊपरे हो गओ। जांच-जूंच चली, सजा दई गई। ऐसई कभऊं- कभऊं कछु सरकारी मालक हरें गांव-मांव में ढूंकबे पौंच जात आएं। सो उते उने कऊं टीचर कम मिलत आएं तो कऊं पूरोई स्कूल में तारो डरो मिलत आए। ओ कऊं-कऊं पढ़ाई की ऐसी के कओ बालक हरें माननीय मोदी जू खों अपने इते को मुख्य मंत्री बता देवें। बाकी जे न सोचो के हम जे वारी पोलों की कै रै। हम जिन पोलों की कै रै, बे दूजी आएं।
का आए के पढ़ाई के लाने स्कूल में सई माहौल बी तो भओ चाइए। औ गांव तो गांव, सहर के कछु स्कूलन में जो हाल आए ऊकी सबरी पोलें तो ई बारिस ने खोल दईं। एक तो कोऊं-कोऊं स्कूल में बच्चों के लाने बैठबे को फर्नीचर लौं नइयां, मनो ऊमें कछू नईं हमने सोई अपने जमाना में सरकारी स्कूल में फट्टी पे बैठ के पढ़ाई करी रई। मनों बरसात में उनकी छत ने टपकत्ती। अब तो ई दार बारिस ने बता दई के बच्चों के मूंड़ पे कां छत चुआ रई औ कां छत को पलस्तर गिर रओ। सो हम जे वारी पोल की बात कर रै। बच्चा हरें पढ़हें औ बढ़हे तब जब उनके मूंड़ पे पानी औ पलस्तर ने टपके। सो, ऐसे स्कूलन में बच्चों की जान की अमान रखी जाए, मालक! देस को आजाद भए 78 सालें हो गईं, औ जे हाल आए स्कूलन को। कछू तो सरम करी जाए, मालक !
------------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment