टॉपिक एक्सपर्ट
गणपति औ दसलक्षणों से जो सीखो, बा याद राखियो
- डॉ (सुश्री) शरद सिंह
दस दिनां गणपति जू पधारे रये औ दस दिनां दसलक्षण पर्ब चलत रये। दोई के कारन पूरे सहर में धूम मची रई। खीबईं चैल-पैल रई। अपन ने एंज्वाय बी करो औ भौत कछू सीखो सोई। जैसे के गणपति के पंडाल में सब सबई के लाने खुले रये, चाय बे कोऊ जात धरम के होऐं। सो ऐसई अब गणपति जू के अपने घरे जाबे के बाद हमें हिलमिल के रैने है औ पंडाल घांई अपने सहर खों साफ-सुथरो राखने है। ऐसई दसलक्षणा से हमने सीखो के क्षमा राखो चाइए। विनम्रता औ सरलता से रओ चाइए। सबई संतोष सोई राखो चाइए। सच बोलबे से कभऊं डरो नईं ने जाए, काए से के झूठ बोले से काला कौव्वा काटत आए। तनक सहूरी से रओ, दान धरम करो, फालतू की जोड़ा-जाड़ी ने करो, जेई सब तो दसलक्षण आए। बस, इत्ती सी तो बात आए के जो हम कायदे से रयें, हिलमिल के रयें तो चाए हमाए गणपति जू होंए, चाए हमाए तीर्थंकर होंए हमपे किरपा राखहें। सो कैबे को मतलब जे इए के जे दोई त्योहार निपट गए तो हमें पल्ली ओढ़ के नईं सो जाने, जो खछू इन दोई त्योहारन से सीखो ऊको याद रखने है। ऐसो नईं के उन भैया जू घांई के बे दस दिनां रोजीना रामकथा सुनबे जात रये औ ग्यारमें दिनां कोनऊं ने उनसे पूछी के राम कोन औ सीता कोन? सो कैन लगे के कोनऊं होंए, अब का करने, अब तो कथा बढ़ा गई। सो अपन खों ऐसो नईं करने। काए से के जब बड़े सुदरहें तो बच्चा हरें सुदरे रैहें।
------------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
