पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
टाॅपिक एक्सपर्ट
छायरी औ पीबे को पानी की कबे रखे जैहें?
- डॉ (सुश्री) शरद सिंह
ई दफा गरमी कछू पैले से परन लगी। अबे जेठ ने आओ औ जेठ घांईं तपन लगो। जेई से ई बेर श्रीराम सेवा समिति वारन ने रेलवे स्टेशन पे एक मईना पैले से अपनी जलसेवा चालू कर दई। ओ सुभै से इते मकरोनिया वारी कचरागाड़ी के भोंपू पे आपदा प्रबंधन वारों की सलाय बजत भई सुनी के घरे से निकरो तो पानी पी के निकरो, दुफारी 12 से 3:00 बजे तक बाहरे निकरबे से बचियो, जो निकरियो सो मूंड़ पे गमछा डारे रहियो। ऐसी मुतकी बातें एनाउंस करी जा रईं ती। अच्छो करो उन्ने। बाकी जा सब से हमें ख्याल आई के बाकी इंतजाम को करहे? सेवा करबे वारे औ आपदा वारे भर पुन्न कमाहें के कछू पुन्न नगरपालिका औ नगरनिगम सोई कमा लेवे।
पर की साल सिविल लाइन चौराहा पे छायरी बनाई गई रई, जीसें ट्राफिक सिग्नल पे रुकबे वारन की खपड़िया ने तपे। ई दार अबे लौं ऐसी छायरी नईं लगाई गई। जागां-जागां पे पियत को ठंडो पानी को घड़ा रखो जाओ चाइए। अब सब ओरें ने तो चार पहिया पे चलत आएं औ ने ठंडे पानी की बाटलें खरीद सकत आएं। ऊपरे से घनी गरमी पर रई। दफ्तरन को टेम सोई बदल दओ जातो तो अच्छो रैतो। बाकी का ऐसो नईं हो सकत का, के टोल नाका घांईं ट्राफिक सिग्नल वारे चौराहन पे सोई परमानेंट छायरी बना दई जाए। ईसे का हुइए के अबे गरमियन में तो बा काम दैहे औ बरसात में सोई भीगबे से बचाहे। औ ऊपरे से हर की साल छायरी लगाबे की सल्ल नोईं। बाकी चाए कच्चो काम करो जाए, चाए पक्को करो जाए, मनो अब छायरी बना दई जानी चाइए। औ ठंडो पानी को घड़ो सोई धरबो सुरू कर दओ चाइए। हमाओ तो जेई कैबो आए।
------------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
