"भैयाजी खांसी मनो ईडी की फांसी" मित्रो, ये है मेरा बुंदेली कॉलम "बतकाव बिन्ना की" साप्ताहिक #प्रवीणप्रभात , छतरपुर में।
------------------------
बतकाव बिन्ना की
भैयाजी खांसी मनो ईडी की फांसी
- डॉ. (सुश्री) शरद सिंह
‘का हो रओ भैयाजी?’’ भरी दुफैरी में भैयाजी अपने पलका पे गुड़ीमुड़ी हो के बैठे हते।
‘‘का होने? खांस-खांस के दम निकरो जा रओ!’’ भैयाजी बोले। बोलतई संगे भैयाजी खों खांसी को दौरा सो पर गओ।
‘‘हऔ! आपको सो भारी खांसी हो गई कहानी।’’ मैंने कई।
‘‘नईं, मोय खांसी नईं भई, जे तो पड़ोसी खों भई आए औ हम ऊके बदले खांस रए।’’ भैयाजी चिढ़त भए बोले।
मैंने उनकी बात को बुरौ नईं मानों। काय से जोन को खांसी हो जात आए, बा खांस-खांस के चिड़चिड़ो हो जात आए। मोय पतो आए। काय से के जबलौं मौसम बदलत आए मोय सोई खांसी, सर्दी टाईप कछू ने कछू हो जात आए।
‘‘कोनऊं दवा लई?’’ मैंने भैयाजी से पूछी।
‘‘हऔ घरेलू ईलाज कर रए। अब तनक-मनक खांसी में डाॅक्टर लौं को भगत फिरै। औ उत्तई नईं, उते जाओ सो तीन-चार सौ पेलऊं फीस के घल जाने, फेर मैंगी दवाई के।’’ भैयाजी बोले।
‘‘सो तो ठीक कई आपने। बाकी मोय नईं लगत के आपकी खांसी बिना दवा के ठीक ने हुइए।’’ मैंने कई।
‘‘हऔ, तुम ठीक कै रईं! मोय सोई जेई लग रओ। दो रातन से सो नईं पा रए। को जाने कां से जे खांसी पांछूं लग गई?’’ भैयाजी बोले।
‘‘मौसम बदल रओ, जेई से सबरे फसाद हो रए।’’ मैंने कई।
‘‘हऔ, बे अपने दिल्ली के मंत्री हरों के सोई मौसम बदल गए कहाने।’’ भैयाजी बोले।
‘‘कोन की कै रए?’’ मैंने पूछी।
‘‘अरे बेई, सिसोदिया औ सत्येन्द्र जैन की कै रए। काय, जे ओरन खांे हेर-फेर करबे में कछू सरम-वरम नईं आत का? इत्ते बड़े मंत्री ठैरे।’’ भैयाजी बोले।
‘‘काय की सरम भैयाजी? बाकी कोयला की दलाली में सबई के हाथ करिया धरे। बो तो जो पकरो गओ, सो चोर कहानो, बाकी साउकार!’’ मैंने कई।
‘‘ठीक कै रईं! जे ईडी के छापे सोई मौसमी खांसी घांई कोऊं-कोऊं खों अपनी चपेट में ले लेत आएं। मौसम बदलो सो छापो पड़ गओ, मने ईके पैले का उने पतो नईं रओ के जे ओरें धांधली कर रए?’’ भैयाजी बोले।
‘‘पतो तो रओ हुइए! बाकी सबूत जुटात रए हुंइए।’’ मैंने कई।
‘‘भैया हरें इत्ते बड़े पैमाने में मनी लांड्रिंग करत रैत आएं औ कोनऊं खो पतो नई परो ऊं टेम पे? बड़ी गजब की कहाई जे बात।’’ भैयाजी बोले। फेर कछू सोचत भए बोले, ‘‘बाकी हमने सुनी सो भौत आए के मनी लांड्रिंग करी जात आए। मनो जे असल में आए का?’’
भैयाजी की बात सुन के उतईं बैठीं भौजी बोल उठीं,‘‘जे लो इत्तई नई पतो? कोनऊं लांड्री वारे के इते मनी छिपा दई रई हंुइए। औ पुलिस वारों खांे पता परी सो उन्ने छापा मार दओ।’’
‘‘का बात भौजी! आपने सो बड़ी नोनी ब्याख्या करी मनी लांड्रिंग की।’’ सच्ची मोय मजो आ गओ भौजी की बात सुन के।
‘‘हऔ, कहूं नईं! ऐसो नईं होत। तुम और कहूं की कहूं दे रईं।’’ भैयाजी भौजी पे बिगरत भए बोले।
‘‘सो का हम गल्त कै रए?’’ भौजी तिनकत भईं बोलीं।
‘‘नईं कई सो आपने सोई ठीक, काय से पईसा बदरबे वारन खों लांड्री वारे ई कओ जाने चाइए। बे करिया खों सुफैद करत रैत आएं।’’ मैंने भौजी से कई।
‘‘बड़ी सयानी बन रईं! तुमे पतो होय सो तुमई बता देओ।’’ भैयाजी चिड़कत भए बोले।
‘मोय सोई ज्यादा सो नई पतो, बाकी इत्तो पतो आए के काले धन को गोरो बनाबे के काम खों मनी लांड्रिंग कओ जात आए। बाकी मैंने कऊं पढ़ो रओ के जे काम तीन तरीका से होत आएं। पैलऊं होत आए प्लेसमेंट। जीमें अवैध रुपइयन खों वैध खातन में डरवा दओ जात आए। दूसरो होत आए लेयरिंग जोन में अवैध रुपइयन खों कई तरीकां से लेन-देन कर के खपा दओ जात आए। औ तीसरो होत आए इंटीग्रेशन, जीके जरिए जे छुपाओ जात आए के जे अवैध रुपया आए कां से।’’ मैंने भैयाजी खों बताई।
‘‘तुमें तो भौत पतो आए। काय तुमने अर्थशास्त्र पढ़ी रई का?’’ भैयाजी मोरे ज्ञान पे खुस होत भए पूछन लगे।
‘‘हऔ, बीए में पढ़ी सो रई। मनो ऊं टेम पे मनी लांड्रिंग इत्तो ने होत रई हुइए जभईं हम ओरन के सिलेबस में जो नईं हतो। जे सो मैंने तब पढ़ो रओ जब मनी लांड्रिंग के बड़े-बड़े केस पकरे जान लगे। आप घांई मोय सोई लगो के ससुरो जो आए का? सो ढूंढ-ढांढ के पढ़ डारी।’’ मैंने भैयाजी खों बताई।
‘‘अच्छो करो! अब अपन ओरन के लिंगे ऊंसईं सफेद मनी के लाले परे रैत आंए, सो अपन ओरें काली मनी के बारे में कां से जान पैहें?’’ भैयाजी बोले।
‘‘रैन तो देओ! हमें ऊंसई नई चाउने कोनऊं काली-पीली मनी। अपनी जो मेनत की आए, बोई साजी आए।’’ भौजी बोल परीं।
‘‘ठीक गई भौजी! जे सब बड़े-बड़े लोगई कर सकत आएं। उनके सो सोर्स रैत आएं औ उनपे जल्दी कोनऊं हाथ नईं डारत आए। इते तो टैक्स भरबे में तनक देर हो जाए, चाय लोन चुकाबे में तनक देर हो जाए सो नोटिस आ जात आए। तनक औ देर होय सो कुर्की वारे पौंच जात आएं। उते तो मनो ईडी के पैलऊं पौंचबे की कोनऊं की दमई नईं होत।’’ मोय सोई गुस्सा सी आन लगी। काय से के मार्च को मईना आ गओ, औ अब बिगैर इनकम के मोय इनकमटैक्स भरबे खों चक्कर लगाने परहे। कोनऊं सीए के लिंगा पौंच के पतो परहे के मोय कछू छूट मिल रई के नईं। सच्ची, इते तो तनक देर भई सो तुरतईं ईमेल औ एसएमएस आन लगत आए। औ उते? उते तो मनो जेई खों छूट देत रैत आएं के जित्ती जोड़ सके सो जोड़ लेओ, कारो को सुफैद कर लेओ, जां-जां ठिकाने लगानी होय सो लगा लेओ। बाकी जो दिना हमाई-तुमाई ठनकहे बोई दिनां तुमे नाप देबी। तबलौं मजे करो। अब जो कोन सो तरीका आए?
‘‘का सोच लगीं बिन्ना?’’ भैयाजी ने पूछी।
‘‘मैं जे सोच रई के आपने जबलों ईडी औ छापे की बतकाव छेड़ी तभई से आप के लाने एकऊं ठसकां लौं नई लगो। आपकी खांसी सोई ईडी घांईं लग रई। कभऊं उठत आए कभऊं चुप्प बैठ जात आए।’’ मैंने हंसत भए कई।
‘‘जे तुम ओरें कुल्ल देर से ईडी-ईडी कर रए। जो ईडी का आए?’’ भौजी ने पूछी।
‘‘अपनी बिन्ना से पूछो! जे पढ़ी-पढ़ाई बैठीं।’’ भैयाजी अपनी छुपात भैया मोपे तीर चलान लगे।
‘‘हऔ सो मैंने पढ़ी आए! आपके जैसे नोईं। बाकी भौजी, ईडी को फुल फार्म आए डायरेक्ट्रेट आॅफ इनफोर्समेंट। जोन को हिन्दी में कओ जात आए प्रवर्तन निदेशालय।’’ मैंने शान से भौजी खों बताई।
‘‘हमें जे न तुमाई अंग्रेजी में समझ परी औ न हिन्दी में। तुम तो हमें बुंदेली में बताओ’’ भौजी बोल उठीं।
‘‘ईडी औ बुंदेली में? मोय नईं पतो। बाकी इत्तो बता सकत हों के जे एक जांच ऐजेंसी ठैरी। जो जे देखत आए के कोन ने अपने देस से बिदेस में औ बिदेस से अपने देस में करिया पैइसा लाओ लेजाओ आए। ईके संगे उन ओरन पे सोई नजर रखत आए जोन के पास आय से अधिक संपत्ति होत आए। बस, आप सो इत्तई जान लो, काम बन जेहे।’’ मैंने भौजी से कई।
‘‘हमाओ का काम बन जेहे? ने तो हमें बिदेस से करिया धन लाने और ने ले जाने। हम सो ऊंसई पूछ रए हते।’’ भौजी मुस्कात भई बोलीं।
‘‘सो भौजी जे मुफत के ज्ञान ने लेओ! कछू चाय-माय पिला देओ!’’ मैंने सोई भौजी खों छेड़ो।
‘‘हऔ! अभई लेओ!’’ कहत भईं भौजी उठ परीं।
इत्ते में भैयाजी की खांसी को मनो याद आ गई के ऊने भैयाजी खों कुल्ल देर से ठेन नई करो, सो उनको खांसी को दौरा परन लगो। भैयाजी की खांसी मनो ईडी की फांसी को फंदा, जोन के गलो परो, बोई रोत फिरत दिखात आए। बाकी, बतकाव हती सो बढ़ा गई, हंड़ियां हती सो चढ़ा गई। अब अगले हफ्ता करबी बतकाव, तब लों जुगाली करो जेई की। सो, सबई जनन खों शरद बिन्ना की राम-राम!
-----------------------------
#बतकावबिन्नाकी #डॉसुश्रीशरदसिंह #बुंदेली #बुंदेलखंड #बिन्ना #भैयाजी #बतकाव #batkavbinnaki #DrMissSharadSingh #bundeli
#bundelkhand #Binna #bhaiyaji #batkav #बुंदेलीव्यंग्य
