टॉपिक एक्सपर्ट | पत्रिका | बुंदेली में
तनक हात-पांव सोई हला लए करे!
- डॉ (सुश्री) शरद सिंह
कल संझा को जेई बतकाव चल रई हती के आजकाल तन्नक सी उमर में हार्ट को अटैक आन लगो। जोन जा जे हार्ट अटैक पैले बुढ़ापा में आत्ते, बे लोहरी उमर में आन लगे। अबई एक 24 साल को ज्वान के बारे में पढ़ो के बो गश खा के गिरो औ ऊको अस्पतालें ले जाबे पे पतो परो के बा तो साईलेंट अटैक से जा चुको आए। ईसे पैले बा शादी में खुसी से नाचत भई मोड़ी साईलेंट अटैक से चली गई। कैबे को मतलब जे के आजकाल दिल की बीमारी के लच्छन पतो नईं परत आए। सो खुदई चौकन्ने रैबे की जरूरत आए।
हमने दो-चार डॉक्टरन से पूछी सो उन्ने बड़े पते की बात बताई। का है के आजकाल जे मोबाईल ने सबई खों ठलुआ बना दओ आए। मोबाईल पे उंगरिया तो चलत आए, मनो इंसान एकई स्टाईल में एकई जांगा बैठो, ने तो डरो रैत आए। कछू जने कसरत-मसरत कर लेत आएं बाकी पिज्जा, बर्गर मसकत कैलेस्ट्रोल बढ़ात रैत आएं। आप ओरन खों यकीन ने हुइए के पूरे एमपी में हार्ट में दरद के सबसे ज्यादा मरीज अपने सागर में आएं। सो, अबे बी कछू नईं बिगरो, बस करने इत्तोई आए के भुनसारे तनक तेजी-तेजी से घूम लए करे। तनक हात-पांव हला लए करे। औ जे शादी-ब्याओ को टेम आए, सो तलो-फुलो मुतके ने मसकियो। गर्मी सोई खींबईं पर रई। सो, हल्को खाइयो औ खीबई पानी पीइयो। कभऊं-कभार अपने दिल की जांच करा लए करे। जे अकेले हम नईं सबरे डॉक्टर कैत आएं। सो, हमाई मानो तो तनक हात-पांव सोई हला लए करे, तभई जा हार्ट बचो रैहे साइलेंट अटैक से।
------------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
