टॉपिक एक्सपर्ट
सागर की बिटियन खों हल्के में ने लइयो
- डॉ (सुश्री) शरद सिंह
जो कभऊं कोनऊं खों जे खयाल आए के मोड़ियां कछु नईं कर सकत औ ऊ पे सागर की मोड़ियां पढ़बे-लिखबे में भलेई तेज होंए लेकन ताकत वारे काम नईं कर सकत। सो, जबे ऐसी सोच आए सो अपनी सोच बदल लइयो औ सोच बदलबे में कछू परेसानी होए तो अपने सागर की बिटिया आयुषी अग्रवाल खों याद कर लइयो। जे कओ जात आए के पावर वेटलिफ्टिंग मोड़ियन की बस की नोंईं। फेर कोऊ बड़ो सहर होए जां बड़े-बड़े कोच होंए, तो एक दार सोची बी जा सकत आए। पर इते सागर में बिटियन खों को सिखा रओ पावर वेटलिफ्टिंग? मनो जे तो तै कहानो के जो इते की बिटियां एक बेर ठान लेबें तो उने कोनऊं बाधा रोक नईं सकत। आयुषी के बारे में जो जान लैहो तो मान जैहो के हम सांची कै रए।
पिछले दिनां सागर के सराफा वारे अशोक अग्रवाल जू की बिटिया ने वेटलिफ्टिंग में 425 किलो को वजन उठा के अपनोईं पिछलो 417 किलो वजन को रिकॉर्ड तोड़ दओ । पाॅवर वेटलिफ्टिंग में इंटरनेशनल लेबल पे सागर की कोऊ बिटिया ने पैली बार पदक जीतो आए। 425 किलो कछू चीज कहाउत आए। इते तो कोऊ मोड़ा 125 किलो उठा लेवे तो ऊकी कम्मर में कुसका लग जैहे। बाकी, आयुषी अपने लड़कपने सेई एक हात से गैस को भरो सिलेंडर उठि लेत्तीं। तनक बड़ी भईं तो जिम ज्वाइन करो। उनके एक ट्रेनर बीना में रैत्ते सो बे रोज सुभे बीना जात्तीं औ उते दो घंटा वर्कआउट करत्तीं। औ फेर उते से लौट के अपनी दुकान सम्हारत्तीं। ऐसी बिटिया पे कोऊ बी नाज कर सकत आए। सो, जेई से हम कै रए की सागर की बिटियन खों कभऊं हल्के में ने लइयो। इते आयुषी घांई बिटियां रैत आएं।
------------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment