पत्रिका | टॉपिक एक्सपर्ट | बुंदेली में
टॉपिक एक्सपर्ट
राखी के त्योहार सो दूसरो नईं
- डॉ (सुश्री) शरद सिंह
राखी को त्योहार एक ऐसो त्योहार आए जीमें बहनें दुनिया के चाए कोनऊं कोना में रयें, मनो अपने भैया को राखी बांधबो नईं भूलतीं, काए से के जेई तो एक बड़ो त्योहार आए भैया बहन को। औ जे अपने इते भौतई पुराने जमाना से मनाओ जा रओ। महाभारत के टेम पे जब दुस्सासन द्रौपदी की धुतिया खेचन लगो तो द्रौपदी ‘भैया बचाओ’ कै के कृष्ण जू खों पुकारन लगीं। द्रोपदी की पुकार सुन के कृष्ण जू आए औ उन्ने द्रोपदी की मदद करी। ईके बाद द्रौपदी ने अपनी धुतिया की किनारी फाड़ के कृष्ण जू की कलाई पे बांध दई। औ बोलीं के जे रच्छासूत्र आए, अब आपको हमाई रच्छा बरहमेस करनी पड़हे। ईपे कृष्ण जू ने कई के काय नईं करबी रच्छा, तुम हमाई बहन आओ। बस, ओई दिनां से भैया बहन को जो त्योहार चल पड़ो।
जो इत्तो अच्छो त्योहार आए के हुमायूं ने सोई ईको मोल समझो। एक हतीं रानी कर्णावती। बे चित्तौड़ की रानी हतीं। जब गुजरात के सुल्तान बहादुर शाह ने चित्तौड़ पर आक्रमण करो तो रानी कर्णावती ने हुमायूं खों राखी भेजी औ एक बहन की मदद करबे के लाने पुकार लगाई। हुमायूं ने सोई राखी को मोल समझो औ कर्णावती की मदद करी। और दूजे त्योहारन पे भलेई तनक फरक पड़ो जा रओ पर राखी को त्योहार आज लौं ऊंसईं आए। बहनें अपने भैया हरों खों की पूजा औ तिलक करके राखी बांधत हैं औ भैया बहनों खों कछू नेंग देत हैं। मनो ईमें सबसे बड़ों नेग होत आए बहन की रच्छा के बचन को। भले डिजिटल राखी को समै आ गओ पर आज बी राखी बांधी जात है औ रच्छा के बचन दए जात हैं। सो, सबई जनों खों हैप्पी राखी!
------------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment