पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
..................................
टाॅपिक एक्सपर्ट
तनक तो गम्म खाओ
- डॉ (सुश्री) शरद सिंह
मुतकी गरमी पड़ रई। मुतकी लाईटें जा रईं। मुतके ढोर-डांगर रोडन पे दंगल कर रये। मुतकी रोडें खुदी डरीं। मुतकी रोडन पे जाम लग रये। पर सब कछू मुतको नई हो रओ। पानी की सप्लाई कऊं मोहाल में दो दिनां में हो रई, तो कऊं-कऊं तीन दिनां में हो रई। सो अब कोन खों फिकर? काय से के इते वोटें तो गिर गईं। चुनाव कढ़ गए। अब रिजल्ट आबे औ आचार संहिता हटबे के पैलई गुणा-भाग होन लगे टैक्स बढ़ाबे के लाने। तनक देखो तो, कितेक जल्दी मची परी। इत्ती जल्दी तो काम पूरो करबे में कभऊं ने दिखानी। सई में, जो आचार संहिता ने लगी होती तो बे ओरें कब के टैक्स-मैक्स बढ़ा चुके होते। मजे की बात तो जे के, टाटा वारों की पानी की लेन अबे ठीक से चालू बी ने भईं औ पानी को टैक्स बढ़ाबे की बात पक्की हो गई। मने इत्ती तेजी से औ कऊं बिकास होय चाए ने होए, पर टैक्स को विकास की योजना सबई तरफी बनन लगी। आचार संहिता हटी नईं के बढ़ो भओ टैक्स घींच पकरन लगहे।
मुतके मुहाल औ कालोनियां ऐसी आएं, जां नाली लौं ठीक से नईं बनीं। औ ने नालियन की सफाई भई आए। अबई बरसातें आईं जा रईं, सो घरों में नरदा को पानी घुंसहें। ऊपे भैया हरें घर को टैक्स बढ़ाबे खों उधारे घूम रए। संगे कओ जा रओ के इंदौर घांईं इते सोई सबरे टैक्स बढ़ाने। हऔ, बढ़ा लेओ, मनो पैले ई शहर खों इन्दौर घांईं बना तो लेओ। चलो, इन्दौर घांई ने बना पाओ, लेकन अपने शहर की कमियां सो दूर करो, मनो फेर, टैक्स ऊके बाद बढ़ा लइयो।
-----------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment