पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
..................................
टाॅपिक एक्सपर्ट
जे पब्लिक खों कुत्तन से को बचा रओ?
- डॉ (सुश्री) शरद सिंह
रोजीना दो-चार लोगन खों कुत्ता काट रये। जोन खों कुत्ता काटत आए, बा बिचारो ऊंसई आड़ो हो जात आए। औ ऊके घरवारे रेबीज़ की सुजी के लाने भैंराने से फिरत आएं। जौ लौं सुजी नईं लगत, त्यौं लौं कुत्ता से कटो वारो औ ऊके घरवारों खों एक धड़का सो लगो रैत आए के को जाने का हुइए? मनो अभईं दिवारी भई, जो होरी होती तो तनक खुल के पूछो जा सकत्तो के भैया हरों जे अपने सागर खों स्मार्ट सिटी बना रये के ‘कुत्ता सिटी’ बना रये? मनो अबे दिवारी, गोवर्धन, दूज में ऐसो बोलबो अच्छो नईं लगत। बाकी हमने कऊं पढ़ी रई के दिवारी से पैले नगरनिगम में एक मीटिंग भई रई औ ऊमें तै करो गओ के कुत्ता हरों खों पकर-पकर के उनकी नसबंदी करी जाहे। जे बिचार तो साजो आए, मनो कोनऊं जे सोई बताए के इत्ते बड़े सांड़ औ बैलवा हरों खों तो पकर नईं पा रये, सो जे कुत्ता कां से पकरहें? चलो, मान लओ के बे ‘कबड्डी-कबड्डी करत भये अपने निगम एरिया के कुत्ता पकर लैंहें, मनो बा एरिया के कुत्तन को का हुइए जोन नगरनिगम एरिया के बाहरे के आएं। जैसे- केण्ट, मकरोनिया, बड़तुमा, बहेरिया घांई जो नगरनिगम में नईंया लेकन उते कुत्ता मुतके आएं।
आजकाल जे कुत्ता हरें बी सयाने ठैरे, बे झुंड बना के फिर रये। औ खूबई गर्रा रएं। जबे जे कोनऊं लोहरे बछड़ा खों घेर लेत आएं, तो ऊको चींथन लगत हैं। बाल-बच्चा के लाने बी जे कम डेंजरस नोंईं। सो, नगरनिगम, नगरपालिका औ केण्ट वारों को संगे योजना बनाओ चाइए। ने तो जे प्राब्लम ऐसे हल ने हुइए।
-------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
