पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
..................................
टाॅपिक एक्सपर्ट
जे जज़्बा जारी राखने जौं लौं ‘भारत रत्न’ ने मिले
- डॉ (सुश्री) शरद सिंह
हमाए बड़े जब हमाए लाने कछू करत हैं, सो बे जे नई सोचत के ऊके बदले उनको कछू मिले। बे तो बस जेई चात आएं के उनके परिवार वारन खों सबकछू मिले औ बे अच्छी जिनगी जिएं। अपने गौर बब्बा मने डॉ हरीसिंह गौर जू ने बी जेई सोची औ इते विश्वविद्यालय खुलवा दओ। बे चात्ते के जोन बिचारे बाहरे जा के आगे की पढ़ाई नईं पढ़ सकत, उन सबई खों इतई सागर मे औ ऊंची पढ़ाई पढ़बे खों मिले। उन्ने नओ-नओ बिषय इते लाओ। एक बिषय रओ एप्लाइड जियोलॉजी, जोन के लाने बे प्रो. डब्ल्यू डी. वेस्ट खों लंदन से इते ल्याये। उन्ने विशवविद्यालय अपने नांव नहीं करो बल्कि अपनी जायदाद विश्वविद्यालय बनाबे के लाने दे दई। आज के जमाना में कोऊ के लाने इत्तो को आ सोच रओ? उन्ने जो करो बिना स्वारथ के करो। जो कछू स्वारथ हतो तो मनो इत्तो सो के इते के लोग कछू अच्छे से पढ़-जाएं।
मनो इते अपन ओरन ने का करो के अबे लौं उने “भारत रत्न” ने दिला पाए। जबके उन्ने अपन ओरन के लाने अपनो सब कछू दे दओ। औ अपन ओरें “भारत रत्न” के नांव पे बर्रयात रये। चलो, जो अलाली भई, सो भई! मनो अबकी बेर जो अपन ओरें मांग कर रये, बा तब लौं ने रुके जब लौं अपने गौर बब्बा के लाने “भारत रत्न” की घोषणा ने कर दई जाए। जे नईं होए कि जनम को उत्सव खतम भओ औ सो गए पल्ली ओढ़ के। मने का समझे, के जे जज़्बा जारी राखने जौं लौं ‘भारत रत्न’ ने मिले, अपन खों चुप नईं बैठने औ अपने गौर बब्बा के लाने ‘भारत रत्न’ ले के रैने।
-------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment