पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
..................................
टाॅपिक एक्सपर्ट
14 रोटी में 40 जने! इने तो नोबेल प्राईज मिलो चाइए
- डॉ (सुश्री) शरद सिंह
ई टेम पे सगरी दुनिया खाबे वारे अनाज की होत जा रई कमी पे मूंड़ से मूंड़ जोर के सोस रई के का करो जाए? ऐसो कोन सो उपाय करो जाए जोन से सबई खों खाबे के लाने मिले औ कोनऊं भूको ने रये। ऊपे सबई देख रये के मौसम बदले जा रये, जलवायु बदली जा रई। सो ईसें आगे औ संकट आने। जेई से कम पानी में होबे वारो मोटो अनाज खाबे के लाने कई जा रई। सरकार सोई “श्रीअन्न” के नांव से ऊके फायदे गिनाऊत फिर रई। मनो जबसे हमने जा खबर पढ़ी के 40 बच्चा हरों के लाने 14 ठइयां रोटियां दई जाती आएं, सो, रामधई! हमाओ तो करेजा दूनो हो गओ। हमें लगी के लेओ हो गई समस्या हल। अपने परधान मंत्री जू, अपने मुख्यमंत्री जू और अपने ऊ अनाज वारे विभाग के मंत्री हरें ऊंसई सोस-फिकर में दूबरे हो रये। अपने इते आंगनबाड़ियन में कछू सयाने तो ई समस्या को पूरो हल जानत आएं। उने बा जादू वारी रोटियां बनाबो आती आएं जोन से 14 से 40 को पूरो पेट भरो जा सकत। औ इत्तोई नोंई, उने पतो के बच्चा तो उछलत-कूंदत आएं उने कच्चो चाऊंर खवा देओ, सो बे कूंद-फांद के पचा लैंहें। ईसे ईंधन की बचत हुइए। सो, चाऊंर अधकचरो बी चलहे।
अनाज औ ईंधन जे दोई तो पूरी दुनिया के लाने सल्ल दये फिर रये औ अपने आंगनबाड़ी वारन में कछू जने जे दोई को हल जानत आएं औ अमल में ला रये। सो, उने तो नोबेल प्राईज दओ जाओ चाइए। हमाई तो जेई कैबो आए, बाकी आप ओरन के बिचार आप बताओ।
-------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment