पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
..................................
टाॅपिक एक्सपर्ट
दुरुपयोग करबे की कोऊ इनसे सीखे
- डॉ (सुश्री) शरद सिंह
लोग बिजली विभाग खों कोसत रैंत आएं के कऊं मोहल्ला की लाईट गुल रई तो कऊं रोड पर की लाईटें हफ्ताखांड़ से बंद आएं। मनो जिते रोड लाईट जल रई हती उते का भऔ? उते जा भऔ के सड़क बत्ती के नैंचे भैया हरें जुआ खेल रये हते। पुलिस ने देखो तो उन ओरन खों पकर लओ। अब बिजली विभाग वारे चाएं सो कै सकत आएं के देख लेओ सड़क बत्ती को कैसो दुरुपयोग करो जा रओ, जेई से तो हम कंटीन्यू बिजली नई देत आएं। जेई टाईप से कारीडोर को दुरुपयोग होत रैत आए। चलो मान लओ बा पूरो को पूरो सेल्फी प्वाइंट औ रील प्वाइंट बन गओ आए। संझा होत साथ उते मोड़ा शूटिंग करन लगत आएं। चलो कोई नईं, इत्तो कर दओ अनदेखो। बाकी चकराघाट की तरफी को कारीडोर कार पार्किंग बन गओ आए। को देख रओ? कोऊ नईं। मनो सबसे बड़ो दुरुपयोग तो जे आए के कछू जनन ने ऊको सुसाइड प्वाइंट बना लओ। आपई कओ के जे बड़ो वारो दुरुपयोग भओ के नईं?
अपने ई सहर में सयानों की कमी नोंई। कछू सयाने रोड को अपनई जागीर समझत आएं। रोड की तरफी पैले दो गमला धरे, फेर गमला को घेरत भये बल्लियां ठोंक के रस्सियां बांधी औ लेओ हो गओ अतिक्रमन सुरू। मनो रोडें चलबे के लाने नोईं घेरबे के लाने बनाई गई होंए। औ कटरा बजार होए चाए निगम मार्केट के इते, फुटपाथ सो दिखतई नईयां। उते तो ठिलियां औ दुकानेईं दिखात आएं। कछू जने तो इत्ते सयाने के ट्रांसफार्मर के खंबा से डोरी बांध के, ऊपे हुन्ना कपड़ा लटका के बेंचत रैत आएं। उने खुदई की जान की परवा नईं। जेई से हम कै रये के दुरुपयोग करबे की कोऊ इनसे सीखे।
-------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment