टाॅपिक एक्सपर्ट
ने कोनऊं खों फिकर, ने कोनऊं खों परी
- डॉ (सुश्री) शरद सिंह
आप ओरें सोच रए हुइयो के हम कोन की कै रए औ का कै रए? सो, ऐसो आए के हम अपनी ब्यथा कै रए, जो आप ओरन की सोई ब्यथा आए मनो आप ओरन खोंं ऊ तरफी ध्यानई ने जात आए। इत्ते सहूरी वारी पब्लिक औ कऊं ने हुइए जित्ती अपने ई सागर में आए। जो हम झूठी कै रए होए सो बताव हमें। हम आप ओरन खों अकेली दो रोडन पे लिवाऊत चल रए। पैली रोड आए राधा तिगड्डा से पुरानी अलंकार टॉकीज लौं की रोड। आप सोच रए हुइयो के हमने जामा मस्जिद से अम्बेडकर तिराहा की काए नईं कई? बोई रोड के इत्ते से टुकड़ा की काय कई? सो भैया, बा टुकड़ाई तो फंदा बनो डरो। बा टुकड़ा रेलपुल के नैंचे से निकरत आए। उते की रोड नाला पे बनी आए। उते बरसात में पानी भर जात्तो सो ऊके निस्तार के लाने रोड पे जाले लगा दए गए। मनो आज जे दसा आए के कोऊ जाला रोड ऊपर निकर आओ है, सो कछू रोड में नैंचें धंस गए आएं। इत्तोई नोईं एक जाला पे फथरा धरें हैं, औ बा एक तरफी से टूटो धरो है। जो कोनऊं भारी गाड़ी ऊपे से गुजरी सो बा जाला को हो जाहे राम नाम सत्त औ गाड़ी नाला में लटकी दिखाहे।
दूसरी रोड आए मकरोनिया से सिविल लेन की जी पे शंकरगढ़ के नजीक एक पानी की लेन को गढ़ा आए। बा बरहमेस बनो रैत आए। ऊके लिंगे से निकरो ऊको घेर के निकरने परत आए। एक तो वन-वे रोड ऊपे घेर के निकरने में औ सकरौंदो हो जात है। मने इन दोई रोडन में एक्सीडेंट के फुल चांस। दोई में खूब भीर गुजरत आए, मनो ऐसो लगत आए के चाए परसासन होए चाए पब्लिक ने कोनऊं खों फिकर, ने कोनऊं खों परी। सई कई न? सोंस के बताइयो!
---------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment