टॉपिक एक्सपर्ट | डियर कुत्ता जू आपको मूड कैसो है? | डॉ (सुश्री) शरद सिंह | पत्रिका | बुंदेली कॉलम

टॉपिक एक्सपर्ट | डियर कुत्ता जू आपको मूड कैसो है? | डॉ (सुश्री) शरद सिंह | पत्रिका | बुंदेली कॉलम

टाॅपिक एक्सपर्ट

डियर कुत्ता जू आपको मूड कैसो है?

- डॉ (सुश्री) शरद सिंह

सुप्रीमकोर्ट के माननीय हरें भौत बुद्धिमान ठैरे, तभईं तो सबरे न्याय के लाने उनपे भरोसो करत आएं। ई दारे बी उन्ने भौतई सई कई। कोन मामला में? सो, ई टेम पे सबसे बड़ो मामलो सामने ठाड़ो आवारा कुत्तन को। देखो जाए तो जे नेशनल इश्यू बन गओ आए। एक तरफी कुत्ता प्रेमी औ दूसरी तरफी आवारा कुत्तन से छुटकारो चाउने वारे। आवारा कुत्तन के साईड वारे लोगन की तरफी से कपिल सिब्बल जू ने सुप्रीमकोर्ट में कई के जो कुत्तन के संगे सहूरी से पेश आओ जाए तो बे न काटहे। ईपे सुप्रीमकोर्ट के माननीय जज हरों ने कई के कोई कोऊ खों पतो नहीं रैत के कुत्ता को मूड का आए औ कबे काट ले। सुप्रीम कोर्ट ने जे सोई कई के स्कूलें होंए चाए अस्पतालें होंए औ चाए अदालत को कंपाउंड होए, उते आवारा कुत्तन खों काए फिरो चाइए? औ ऐसी जांगा से उने हटाबे में कोनऊं खों काए आब्जेक्शन भओ चाइए?

    आवारा कुत्तन खों जो मामलो आए जो सुप्रीम कोर्ट में चल रओ। सो, अपन ओरें डिसीजन होबे लौं का करें? जे बात हमने अपने एक पैचान वारे वकील से पूंछी सो, बे बोले के तब तक जो आवारा कुत्ता सामने परे तो ऊंसे तुरतईं पूछियो के ‘‘डियर कुत्ता जू आपको मूड कैसो है? आप हमें काटहो तो नईं? जो ऊको मूड ठीक हुइए तो न काटहे औ जो ऊको मूड खराब हुइए तो सुजी लगाबे वारे खों ढूंढियो।’’  जा उन्ने ठिठोली में नोंई, पूरी गंभीरता से कई रई। सो, डिसीजन आबे तक तनक बच के रहियो आवारा कुत्तन से। संगे जा सोई सोचियो के जोन देस में कुत्ता रोड पे आवारा नईं फिरत का उते के लोग कुत्ता खों चाउने वारे नईं होत?

---------------------

Thank you Patrika 🙏

Thank you Dear Reshu Jain 🙏

#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका  #patrika #rajsthanpatrika #सागर  #topicexpert #बुंदेली #बुंदेलीकॉलम