टाॅपिक एक्सपर्ट
गरब करो संविधान सभा के मेंबर रए अपने गौर बब्बा
- डॉ (सुश्री) शरद सिंह
26 जनवरी आत-आत हमें गणतंत्र दिवस मनाबे को जी करन लगत है। अब हर कोऊ अपने घरे अपनो तिरंगा लगा सकत आए। कित्तो अच्छो लगत आए न जे सोंस के, के अपन आजाद आएं, अपनो एक संविधान आए। अपनो गणतंत्र दुनिया को सबसे बड़ो गणतंत्र आए। आजादी के पैले 9 दिसम्बर 1946 को संविधान सभा की पैली बैठक भई रई। मनो 26 जनवरी 1950 को अपनो जो संविधान लागू भओ। जेई से अपन 26 जनवरी खों गणतंत्र दिवस मनाऊंत आएं।
औ अपन सागर वारों के लाने गरब करबे की बात जे आए के डॉ हरीसिंह गौर जू मने अपने ‘गौर बब्बा’ संविधान सभा के 84 मेंबरन में खास मेंबर रए। बे सेंट्रल प्रोविंस एंड बेरार से संविधान सभा के मेंबर चुने गए रए। बे ड्राफ्टिंग कमेटी में भले नईं रए मनो बे ड्राफ्टिंग के लाने रखे जाबे वारे प्रस्तावन पे बहस करबे वारी कमेटी में रए औ उन्ने मुतके जरूरी मुद्दन पे बहस करी, जीसे अच्छो संविधान बन सको। ‘हम भारत के लोग’ से सुरू होबे वारे अपने संविधान में प्रस्तावना के संगे 470 से ज्यादा अनुच्छेद आएं औ 25 भाग के संगे 12 अनुसूचियां आएं। सो, पैली बात तो जे के हमें अपने गणतंत्र पे गरब करो चाइए, काए से के ईमें अपने गौर बब्बा को बी योगदान रओ। दूसरो ई लाने के अपनो गणतंत्र दुनिया को सबसे बड़ो गणतंत्र आए। ऐसो गणतंत्र जीमें सबई जात, धरम औ करम के इंसा एक बरोबर माने गए आएं। सो, बकरियां घांईं “मैं-मैं” करबे की जांगा हमें सोई अपने सागर की भलाई औ विकास के लाने सोचबो चाइए के ‘हम सागर के लोग’ औ मिलजुल के काम करो चाइए। सो, सबई मिल के संगे बोलियो- “अपने गणतंत्र की जै!” “गौर बब्बा की जै!”
---------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
#गणतंत्र #संविधान #कर्तव्य #संविधानसभा #डॉहरीसिंहगौर
No comments:
Post a Comment