टाॅपिक एक्सपर्ट
जबरा मारे औ रोन न दए
- डॉ (सुश्री) शरद सिंह
कछू कहनात जिनगी में ऐसी फिट बैठत हैं के मानो ओई के लाने बनी होएं। जो ज्ञान मिलो हमें ऊ दिनां जबें हम मकरोनिया तिगड्डा पे कछू काम के लाने गए रए। का भओ के। जां हम ठाड़े हते उतई बाजू में मेडिकल स्टोर हती। एक आदमी अपनी फटफटिया पे आओ औ हड़बड़ात भओ फटफटिया ठाड़ी कर के दवाई लेबे दूकान पे चलो गओ। आजकाल ऊंसई खांसी, सर्दी, बुखार को महौल चल रओ सो दूकानपे भारी भीर हती। उते बा आदमी भीर में घुसो औ इते टिरेफिक वारे गाड़ियन के चका में तारो डार के आगे बढ़ गए। जो लौं बा आदमी दवा ले के अपनी फटफटिया के लिंगे पौंचो तो जा देख के सनाका खा गओ के ऊकी गाड़ी के चका में बड़ो सो तारो डरो। अब बा छटपटान लगो के ऊको दवाई लेके तुरतईं घरे पौंचने। काए से ऊको मोड़ा खींबई बीमार हतो, जीको सुजी लगने ती। कछू जने ने पता करो के बे टिरेफिक वारी गाड़ी तो तारो डारत भई दूसरे चौराए पे जा पौंची है सो जा सुन के बा आदमी औ घबड़ानों। इत्ते में एक स्कूटी वारो उते आओ। ऊको दया आई। बा भाग के गओ औ टिरेफिक गाड़ी से तारो खोलबे वारे को अपने पांछू बिठा के लाओ। तब कऊं बा आदमी दवाई ले के जा पाओ।
अब आप कैहो के बे टिरेफिक वारे अपनी ड्यूटी कर रए हते। हऔ! बाकी जा तब सई ठैरतो जबे मकरोनिया पे कोनऊं ढंग को पार्किंग जोन होतो औ गाड़ी जोन के बायरे रैती। मने एक तो सई से पार्किंग जोन नईं, ऊपरे से चका में तारो औ चालान। सो, भओ न के जबरा मारे औ रोन न दे।
---------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment