टॉपिक एक्सपर्ट | हैप्पी दिवारी मनाइयो पर तनक सम्हर के | डॉ (सुश्री) शरद सिंह | पत्रिका | बुंदेली कॉलम
टाॅपिक एक्सपर्ट
हैप्पी दिवारी मनाइयो पर तनक सम्हर के
- डॉ (सुश्री) शरद सिंह
अब आप कैहो के त्योहार के टेम पे बी सिखावन दे रईं, का हम ओरें पैली बार दिवारी मनाबे जा रये? सो, ऐसी बात नोंई! बात सिखावन की नोंई याद दिलाबे वारी आए। काए से के दिवारी मनाबे के जोस में अपन लापरवाई कर बैठत आएं। जैसे मिठाई औ खोबा लेबे में। अब दिवारी पे घरे मिठाई तो बनहेई। औ होत का है के मंगाए, मंगाए से बी कोऊ खोबा ला के ने दे रओ होय, औ ओई टेम पे कोऊ दोरे से “खोबा ले लो” टेरत भओ निकरे तो लगत आए के मनो लाटरी लग गई। ऊ टेम पे हमें खोबा दिखात है, ऊमें की गई मिलावट नोंई। बा तो नकली खोबा पकरा के बढ़ लेत आए औ हमें बाद समझ परत आए के बा तो चूना लगा के चलो गओ। अब नकली खोबा खा के तबीयत तो बिगारी नईं जा सकत सो, ऊको मेंकनईं परत है। सो अच्छो खोबा औ अच्छी मिठाई लइयो। सस्ती के फेर में नकली ले के तबीयत ने बिगारियो। कम भले लइयो, पर साजी लइयो।
एक बिनती औ आए के लोहरे मोड़ा-मोड़ी खों तभई पटाखे औ बम फोरन दइयो जब आप ओरें उनके संगे होंए। ने बच्चों खों कां खबर, बे कओ अपनेई मूंड़ के निसाना पे राकेट दाग लेवें । संगे जा बी ध्यान राखने के कोनऊं जानवर खों परेसानी न होने पाएं। का होत आए के बच्चा हरें कऊं कोऊ कुत्ता की, ने तो गइया की पूंछ में पटाखों की लरियां बांध देत आएं। ईसे उन पसुअन खों खींबई तकलीफ होत आए। सो, जे तनम-मनक सी जरूरी बातें ध्यान राखियों औ अच्छे से हैप्पी दिवारी मनाइयो। लछमी मैया की किरपा सब पे बनी रैहे ।
—----------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment