टॉपिक एक्सपर्ट | दस मूंड़ को रावन बार दओ, अब बुराई सोई बार देओ | डॉ (सुश्री) शरद सिंह | पत्रिका | बुंदेली कॉलम
टाॅपिक एक्सपर्ट | दस मूंड़ को रावन बार दओ, अब बुराई सोई बार देओ
- डॉ (सुश्री) शरद सिंह
दसेरा कढ़ गओ। सहर में मनो मुतकी जांगा रावन जलाओ गओ, मगर दो जांगा पे खीब बतकाव चली। एक तो पीटीसी ग्राउंड वारी जांगा जहां सहर की महपौर ने पौंचीं, काय से के निगम के आयुक्त जू ने उनको अपमान करो है, ऐसो उनको कैबो आए। बाकी त्योहार म्योहार के समै ऐसो करो नईं चाइए। अखीर बे सहर की महापौर ठैरीं, उनको सम्मान राखो चाइए। जेई से तो कछू सयाने कै रए हते के रावन की नाभी में दो दार तीर घालो गओ फेर बी बा न मरो। बा तो ऊके पैरन में लुघरिया छुबाई गई, तब कऊं बा जरो। अब ई बात खों को कां से जोर के देख रओ, जे तो बेई जानें। बाकी मकरोनिया पे बजरिया वारे रावन सोई अड़ी दिखा गओ। जबके उते विधायक रए, सांसद रईं, नगरपालिका के अध्यक्ष रए औ भारी भीर रई। उते कोनऊं मनमुटाव नईं रओ। मनो रावन जबे जलाओ जा रओ तो ऊकी मुंडी से तनक सी आगी निकरी औ फुस्स हो गई। फेर ऊपे पेट्रोल डार के ऊको जलाओ गओ। रावन बी सोचत हुइए के जे हम कां फंस गए। ऐसी गत तो रामजी के जमाने में ने भई। मनो कभऊं-कभऊं ऐसो हो जात आए, कछु नईं।
बस जेई आए के जैसे दस मूंड़ को रावन जलाओ गओ ऊंसई सबरे आपसी बुराई बार देवें। काए से आपस में लड़े से अपनोई नुकसान होत आए। औ ऊंसईं सहर में फैली सबरी बुराई सोई बार देओ, जीसें अपन ओरें शान से मूंड़ उठा के कएं के अपनो सागर, नोनो सागर!
—----------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #topicexpert #बुंदेली #बुंदेलीकॉलम
No comments:
Post a Comment