Saturday, November 21, 2026

टॉपिक एक्सपर्ट | अलाव को सीजन आ गओ, पब्लिक ठिठुरे ईके पैले बारन लगो अलाव | डॉ (सुश्री) शरद सिंह | पत्रिका | बुंदेली कॉलम

टाॅपिक एक्सपर्ट

अलाव को सीजन आ गओ, पब्लिक ठिठुरे ईके पैले बारन लगो अलाव
- डॉ (सुश्री) शरद सिंह
अपने इते होत का आए के जबे लौं दो-चार निपट नें जाएं तब लौं प्रसासन के कानों में जूं नईं रेंगत। ने मानों तो रोड एक्सीडेंट खों देख लेओ। चाए रोड पे चार-चार ठइयां कुद्दा मने बम्पर बनाबे वारे होंए, चाए डिवाइडर बनाबे वारे, जब लौं मुतके एक्सीडेंट नें हो जाएं उने खबर नईं रैत के उते कोनऊं को राम नाम सत्त बी हो सकत आए। इत्ते भोला होत आएं अपने इते के बम्पर औ डिवाइडर बनावे वारे। औ ई टेम पे तो सिविल लेन से मकरोनिया लौं गजबई मचो आए। अब आप कैहो के रोड को नओ ढंग से बनाऊत बेरा उते से कढ़बे वारन खों परेसानी सो झेलनई परत आए। हऔ, सई आए! मनो उते टिरेफिक पुलिस वारे ठाड़े हो के कछू मदद तो कर सकत आएं। लेकन उते कोनऊं नईं दिखात। ऊ रोड पे से गुजरत बेरा ऐसो लगत आए मनों मौत के कुआ में बाईक चला रए होंए।
चार दिना पैले सबई कैत्ते के ई दफा अब लौं जाड़ो नईं परो। सो अब जो जाड़ो आओ तो फुरसत से आ धमको। फेर ऊंसई अब जड़कारो बढ़त जा रओ। दिन में तो मनों सूरज देवता दरसन दे देत आएं, पर रात की बेरा बायरे निकरो तो हात-पांव ठिठुरन लगत आएं। ऐसे में उनकी सोचियो जोन के मूंड़ पे छत नोंई। उनकी सोचियो जोन खों बसस्टेंड औ रेलवे स्टेसन में गाड़ी पकरबे के लाने रात को घंटा-दो घंटा ठाड़े, बैठे रैने परत आए। ऊंसईं मालक की किरपा से अपने इते से ज्यादा ट्रेनें रातई खों कढ़त आए। सो, नगर निगम औ नगर पालिका वारे अब अलाव बारन लगें तो ठीक रैहे। बे जे नें सोंचत रैएं के जब लौं दो-चार ठिठुर के टें ने बोल जाएं अपन खों पल्ली तरें दबे रैने। सो, भैया हरों, अब झट्टई फीता कटवा डारो अलावन को।
—----------------
 Thank You Patrika 🙏
Thank you Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #बुंदेलीकॉलम #patrika #rajsthanpatrika  #topicexpert #बुंदेली

No comments:

Post a Comment