टॉपिक एक्सपर्ट | तीन से दो औ एक बी हो सकत्तो नंबर जो तनक औ सफाई राखते | डॉ (सुश्री) शरद सिंह | पत्रिका | बुंदेली कॉलम

टाॅपिक एक्सपर्ट

तीन से दो औ एक बी हो सकत्तो नंबर जो तनक औ सफाई राखते

- डॉ (सुश्री) शरद सिंह

     सई में बा खबर पढ़ के जी कद्दू के फूल सो खिल उठो। खबरई ऐसी हती। सफाई के लाने छोटे सहरन की सूची में अपने सागर खों तीसरो स्थान मिलो। कछू देर हमें ई खबर पे भरोसो सो नईं भओ। फेर कछू देर हमने ई बात की खुसी मनाई फेर हमें गुस्सा आन लगो। अब आप ओरें सोच रए हुइयो के ईमें गुस्सा करबे की का बात आए? सो बात जे आए के जो अपन सागर वारे तनक औ सफाई राख लेते तो का बिगर जातो? ऊंसई-ऊंसई सफाई राखे में तो तीसरो नंबर आ गओ, तनक ऐसईं-ऐसईं सफाई राख लेते तो कओ पैलो नंबर आ जातो। जेई सोचत साथ हमें बा सबरे फ्लाई ओवर को खयाल आ गओ जोन पे गुटखा औ कुरकुरे की पन्नियां बगरी रैत आएं। रामधई, हमने तो जबे बी अपने इते के कोनऊं बी फ्लाई ओवर पे फोटू खेंचाई ऊमें पांव के पास पन्नी जरूर दिखा जात आए। मने फोटू में से तो पन्नी एडिट कर के मेंट देओ, मनो वीडियो में का करो जाए, बा तो कैसऊं बी नईं मिटत आए। सो, एक पन्नी के मारे हमाई पूरी रील को सत्यानास हो जात आए। काए से के जो बा रील सोसल मीडिया में डारो तो दुनिया भरे खों पता पर जाहे के सागर वारे फ्लाई ओवर को बी नईं छोड़त आएं, उते बी कचड़ा बगरात रैत आएं। औ हम कचड़ा वारी रील डार के अपनो सागर को नांव बिगरन नईं दे सकत। हम सोई चात आएं के कचड़ा खों ले के हमाओ सहर को कोऊ नांव खराब ने कर पाए।

मनो तीसरे नबंर पे आनो बी कोऊ खराब नोईं। ईंसे जो तो पतो परो के सफाई के नंबरन में अपनो सागर सोई ठंस सकत आए। सो, अगली बेर के लाने तनक औ सफाई राखने, तनक औ जोर लगाने, औ पैलो नंबर लाने। जा याद राखियो !

----------------

 Thank You Patrika 🙏

Thank you Reshu Jain 🙏

#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #बुंदेलीकॉलम #patrika #rajsthanpatrika  #topicexpert #बुंदेली