टाॅपिक एक्सपर्ट
फर्जी बाड़ा से तनक बचके रहियो
- डॉ (सुश्री) शरद सिंह
सब ओरें चात आएं के एक ठइयां अपनो घर होए। अपने मूंड़ पे अपनी छत होए। जो पुताई कराबे की बेरा आए सो अपने घरे कराएं, अपने मन को रंग कराएं। शार्ट में कई जाए सो सब चाऊंत आएं के उनको अपनो घर होए। जेई लाने सब एक-एक पईसा जोड़त रैत आएं। मनो अपने इते का आए के प्रॉपर्टी के दाम आसमान छूअत रैत आएं। ऐसे में जो कोनऊं सस्ते में सबरी सुविदा वारे प्लाट को, ने तो सस्ते मकान को ढिंढोरा पीटत आए तो लालच में परबे में देर नईं लगत। सो भैया-बैन हरों, जे ई टाईप के ललत्तापने में कभऊं ने परियो। पैले अच्छे से पता कर लइयो के बा कालोनी जोन में प्लाट, ने तो घर ले रये बा वैध तो आए न! ऊको डायवर्सन भओ, के नईं भओ? कछू सेसा-मेसा को बिधौंना तो नईं बिधों? काये से के आप सो अपनी जिनगी भर की पूंजी लगा के प्लाट या घरे खरीद हो औ बाद में पता परी के कालोनी अवैध निकरी सो आप का कर लैहो? आपखों तो चूना लग चुको हुइए। जेई के लानें हम कै रये के प्रापर्टी खरीदियो, मनो पैले अच्छे से जांच लइयो।
जा सब हम जे लाने बता रये के हमाई एक चिनारी वारे जेई मामला में ठगा गए। आजकाल जे टाईप की सोच सोई चलन लगी आए के ‘कछू नईं, बाद में सबरी अवैध, वैध हो जात आएं।’ सो, जे भुलावा में ने रहियो। काये से के अब सब कछू डिजिटल होन लगो, सबरे रिकॉर्ड पक्के रैत आएं, सो ऊमें करो गओ घपला चल नईं सकत। सो, चौकन्ने रओ औ अपनो घर बना के ऊमें राजी खुसी से रओ। काए हमाई सलाय सई आए न!
-----------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment