टॉपिक एक्सपर्ट | ब्याओ में ने करियो अन्न की बरबादी | डॉ (सुश्री) शरद सिंह | पत्रिका | बुंदेली कॉलम
टाॅपिक एक्सपर्ट
ब्याओ में ने करियो अन्न की बरबादी
- डॉ (सुश्री) शरद सिंह
ब्याओ को सीजन सुरू होतई साथ न्योते सोई आन लगत आएं। कछू जने जेई लाने परखे रैत आएं के कबे न्योतो आए औ बे ब्यौहार निभाबे के लाने पौंचे। फेर अकेले ब्यौहार निभाबे की बात नोंई रैत। न्योते में जीमबे मने ‘स्वरुचि भोज’ की ब्यबस्था सोई रैत आए। पैले तो का होत्तो के पंगत लगत्ती। बराती, घराती, मैंमान हरें सबई पंगत में जीमत्ते। परसबे वारे पूंछ-पूंछ के बड़े प्रेम से सबरे ब्यंजन परसत जात्ते। ने कम, ने ज्यादा। मनो कोनऊं खों अफरत लौं खाने होय सो बा तब लौं खा सकत्तो जब लौं अफर ने जाए। बाकी एक नियम रैत्तो के पत्तल पे जूठो ने बचो चाइए। ऊको अन्न को अनादर मानो जात्तो। सो, ईसे जूठो अन्न न बचत्तो औ ने फिंकत्तो।
अब आजकाल का आए के बिदेसन की नकल में चल गओ आए बुफे। कायदों ऊको बी जेई आए के जित्तो जो खाने हो उत्तई अपनी प्लेट पे लेओ। मनो होत का आए के स्टालन पे मची रैत आए गदर सी। सो, सबई जने सोचत आएं के जित्ती बने प्लेट भर लेओ औ कऊं पसर के जीमों जाए। अब कोऊ ब्यंजन अच्छो लगत आए कोऊ नईं लगत। कोऊ पूरो खा लेत, तो कोऊ की प्लेट में मुतको बचो रै जात आए। बा जूठो कोऊ के काम को नईं रैत। जो बनाबे वारे या फेर परसत वारे बासन में साजो खाना बचे तो बा कोऊ गरीब-गुरबा, ने तो कोनऊं संस्था में भेजबे के काम आ जात आए। सो, अब कोनऊं ब्याओ के न्योतो में जाओ सो, खयाल राखियो के खाना की बरबादी ने होने पाए। जी भर के खाइयो, मनो प्लेट में उत्तई लेत जाइयो जित्ते में फिंके ना। काए से के अन्न से बढ़ के कछू नईंयां।
-----------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment