टॉपिक एक्सपर्ट | जड़कारो आ गओ है, अपनो अच्छे से ख्याल राखियो | डॉ (सुश्री) शरद सिंह | पत्रिका | बुंदेली कॉलम
टाॅपिक एक्सपर्ट
जड़कारो आ गओ है, अपनो अच्छे से ख्याल राखियो
- डॉ (सुश्री) शरद सिंह
अब आप कैहो के जड़कारो सो, हर की साल आऊत आए, ईमें नओ का आए? सो, नओ तो कछू नइयां, सिवाय ईके के मौसम बदल रओ जीसे सबई तरफी खांसी औ सरदी फैली आए। जोन को देखो बोई खांस रओ, छींक रओ। सो अपन को ऐसे लोगन से तनक दूरी बना के रैने। का आए के अपन ओरों मन से कछू हरों खों इत्तो सऊर नईं रैत के खांसे के टेम पे मों पे एक ठइयां रुमाल राख लेवें। बे तो बिंदास सामनेवारों के मों पे खखरत रैत आएं। जेई से खांसी फैलत जात आए। सो, बे न अपनों मों ढांपें तो अपन खुदई अपनो मों ढांप लो। संगे अब ठंडो-मंडो खाबो-पीबो छोड़ देओ। भले दुपारी में गरम सो लगे। काए से के जेई ठंडो-गरम तो नुकसान करत आए।
औ एक बात औ के जड़कारो के संगे आ गओ आए शादी-ब्याओ को सीजन। बुरौ ने मानियो पर सांची कए रए के शादी-ब्याओ में भैया हरें सो खीब अच्छो सूट-मूट डांट के पौंचत आएं, मनो अपनी बैन हरें कछू ज्यादा दिखावा में पड़ जात हैं औ पतरी सी धुतिया-हुन्ना पैन्ह के पौंच जात आएं। देखत में तो बे बड़ी खबसूरत दिखात आएं पर ठंडी खा के बीमार परे को डर बनो रैत आए। सो, ऐसो हुन्ना पैन्हियो के फैसन को फैसन हो जाए औ ठंडी बी ने खाने परे। ने तो होत का आए के घंटा खांड़ के दिखावा में मईना भर को कष्ट पल्ले पड़ जात आए। सो, हमाई जेई बिनती आए सबई जने से के जड़कारो में अपनो ख्याल राखियो।
-----------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment