टाॅपिक एक्सपर्ट
जे मिलावट वारे सो भगवान खों तक नईं छोड़ रए आए
- डॉ (सुश्री) शरद सिंह
जब से बा खबर पता परी तभई से जी में खटका सो लगो रैत आए के कऊं कोनऊं मिलावटी किराना ने पकरा देवें। काए से के आजकाल मिलावट करे वारे भगवान से नईं डरा रए औ उने बी चूना लगाए दे रए। आप ओरन ने सोई बा खबर पढ़ी हुइए के तिरुमला तिरुपति देवस्थानम में जोन प्रसाद बनत्तो ऊके लाने जोन कंपनी मंदिर खों घी सप्लाई करत्ती ऊने जानवरन की चर्बी वारो घी सप्लाई करी। वा बी एकाद दार नोईं, पूरी पांच-छै साल लौं। मने 2019 से 2024 लौं। जोन की कुल्ल कीमत ₹250 करोड़ रई। अखीर, 68 लाख किलो घी कछू चीज होत आए। औ बा पापी हरों ने कंपनी को नांव 'वैष्णवी डेयरी' रखो रओ। मने देवी जू को धरो औ पांछू से मिलावट को चूना लगा रए हते, वा बी नॉनवेज वारो। जांच में पाओ गओ के बा घी में मछली को तेल, बीफ टैलो औ लार्ड मिलाओ जा रओ हतो। रामधई, ठठरी के बंधों को तनकऊ लाज ने आई। जा ने सोचो उन ओरन ने के मंदिर में चढ़ाओ गओ परसाद भक्तन में बंटत आए। अब उमें कई भक्त तो ऐसे रए हुइएं के जो प्याज-लैसुन लौं ने खात हुइएं, उनखों चर्बी वारो घी ख्वा दओ। सो, जा खबर पढ़े के बाद से मन में संका सी बैठ गई कहानी।
जे खबर ई लाने बी याद राखने के मिलावट खाली त्योहारन के टेम पे भर नईं होत आए, मिलावट करबे वारे कभऊं बी, कऊं पे बी मिलावट कर सकत आएं। सो, अपन खों सोईं तनक चौकन्ने रैने। जो लगे के सामान में मिलावट करी गई आए, सो बा ने खरीदो। संगे शिकायत सोई करो। अपनी सेहत को खयाल अपन खों खुद राखो चाइए। सई कई न!
-----------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment