टॉपिक एक्सपर्ट | बधाई ! पूरो 70 बरस को हो गओ अपनो मध्यप्रदेश | डॉ (सुश्री) शरद सिंह | पत्रिका | बुंदेली कॉलम
टाॅपिक एक्सपर्ट
बधाई ! पूरो 70 बरस को हो गओ अपनो मध्यप्रदेश
- डॉ (सुश्री) शरद सिंह
1 नवंबर 1956 को अपनो मध्यप्रदेश बनो रओ। ईके पैले जा सेंट्रल प्राविंसेस औ बरार मने सीपी एंड बरार कहाऊत्तो। मने जबसे जा अलग प्रदेश बनो ईने भौतई तरक्की करी। जोन खों याद ने होय सो याद करा दओ जाए के मध्य भारत, विंध्य प्रदेश औ भोपाल राज्यों खों मिला के ईको बनाओ गओ रओ। पैले छत्तीसगढ़ सोई जेघ में रओ, बाकी 2000 में बा अलग हो गओ। एक मजे की बात जा रई के ईको नांव मध्यप्रदेश ई लाने रखो गओ, के जा अपने देस के बीचोबीच आए। मध्यप्रदेश के पैले मुख्यमंत्री हते रविशंकर शुक्ल जू औ पैले राज्यपाल हते महामहिम भोगराजू पट्टाभि सीतारमैया। दोई ने प्रदेस के लाने खींबई काम करो। बाकी फेर जोन-जोन कुर्सी पे आए उन सबने प्रदेस के लाने कछु ने कछू अच्छोई काम करो।
सो, अपन ओरन को सोई गर्व करो चाइए के अपनो सागर देस के दिल कओ जाबे वारे मध्यप्रदेश के दिल में आए । सो अपन खों गर्व करबे के संगे अपने प्रदेश को खयाल सोई राखने है। ईकी प्रगति में अपनी प्रगति हुइए। जा जो साफ सुथरो रैहे सो अपनी बी बड़वारी हुइए। जा जो भ्रष्टाचार से छूछो रैहे सो अपनी जिनगी बी अच्छी रैहे। सो, अपन सबई खों अपने प्रदेस के हैप्पी बर्थडे पे खूब-खूब बधाई !
-----------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
