बतकाव बिन्ना की | जो कऊं ऊ टेम पे मोबाईल होतो तो वीरगाथा काल को का होतो | डाॅ (सुश्री) शरद सिंह | बुंदेली कॉलम

बतकाव बिन्ना की

जो कऊं ऊ टेम पे मोबाईल होतो तो वीरगाथा काल को का होतो?

  - डॉ. (सुश्री) शरद सिंह

‘बिन्ना आज कोन सो दिन आए?’’ भैयाजी ने कछू सोंसत भई मोसे पूछी।

‘‘आज गुरुवार आए।’’ मैंने कई।

‘‘और?’’ भैयाजी ने फेर के पूछी।

‘‘और का?

‘‘आज कछू खास दिनां औ आए।’’ भैयाजी बोले। 

‘‘हऔ, सो आप विश्व पुस्तक दिवस की आ कै रए!’’ मोए समझ में आ गई के भैयाजी मोसे का कहाबो चा रए आएं।

‘‘तुमने तो मुतकी किताबे लिखीं, बा बी बिगैर कट-पेस्ट करे।’’ भैयाजी बोले।

‘‘सो, किताबें तो ऐसईं लिखी जात आएं, कट-पेस्ट वारी तो चोरी कहाऊत आएं। बाकी आप कैबो का चा रए?’’ मोए अब फेर के समझ ने परी के बे का कैबो चा रए?

‘‘हम जा सोच रए के जो कऊं राजा हरों के टेम पे मोबाईल चल परो होतो तो ऊ टेम के कबित्तों को का होतो? औ ऊ टेम के कवियन को का होतो?’’ भैयाजी फेर के सोंसत भए बोले।

‘‘का होतो? जोन खों ऊ टेम पे कबित्त लिखने होतो, सो बा ऊ टेम पे बी लिखतो। मोबाईल आए से का कविताई बढ़ा गई?’’ मैंने भैयाजी से कई।

‘‘कविताई बढ़ा नोंईं गई, ऊकी तो बाढ़ आ गई। जोन खों देखो बोई उल्टी-सीदी कबिताएं सोसल मिडिया पे पेलत रैत आए। औ इत्तई नईं, ऊके बाद अपने पइसा से बा कचूमर सलाद घांईं कविताओं की किताब छपा के खुद खों भूषण औ रहीम को चचा समझन लगत आए।’’ भैयाजी बोले।

‘‘कचूमर सलाद घांईं कविताएं, वाह! का तुलना करी आपने।’’ मोए हंसी फूट पड़ी।

‘‘सई सी तो कै रए। मनों जे सोचो बिन्ना के ऊ टेम पे कवि हरें अपने राजा जू के संगे लड़ाई के मैदान में सोई जात्ते। उतई से बे आंखन देखी कबिताएं लिखत्ते। अपने कवि भूषण सोई संगे जात रए।’’ भैयाजी बोले।

‘‘हऔ बे ओरें डरात ने हते।’’ मैंने कई।

‘‘हऔ, अब के तो बीर रस वारे कवियन खों देख लेओ तनक, मंच पे तो बे पाकिस्तान औ चीन की दारी-मतारी करहें औ कओ के भैया तनक सेना में भर्ती हो के उन ओरन से लड़ आओ, सो कओ पतरी गली से दौर लगा देवें।’’ भैयाजी हंसत भए बोले।

भैयाजी की बात सुन के मोए सोई हंसी आ गई। मनो बे कै सांची रए ते।

‘‘ऐसो आए भैयाजी के आजकाल के कवियन कोनऊं राज्य नईं जीतने रैत आए, उनें तो बस, मंच लूटने रैत आए। अब राजा औ लुटेरा में कछू फरक को हुइए के नईं? फेर ऊ टेम के कवियन खों जे ध्यान रखने परत्तो के उनके राजा जू को एकऊ कारनामों ने छूट जाए। बे सब कछू ठीक से देखें औ ऊको अपने कबित्त में लिख देबें। मनो आज के मंच बिराजे कवियन खों जे ध्यान रखने परत आए के उनकी वीडियो ठीक से बनाई जा रई के नईं? उनको कवितापाठ लाईव दिखाओ जा रओ के नईं? औ सबसे बड़ी बात के ऊ टेम के कबियन खों जे पतो नईं रैत्तो के उनके राजा जू सई-सलामत लौटहें के नईं। जो बे ने लौट पाए तो उनें इनाम-इकराम देबे वारो कोऊ ने रैत्तो। मनो आज के जे कवि पैलई ठैरा लेत आएं के तुमाओ प्रोगराम चाए चले के पिटे, हमें तो इत्ते रुपैया चाऊने, मने चाऊने। औ मुतके बड़े नांव वारे कवि सो पैलई एडवांस ले लेत आएं। काए खों बे रिस्क में रएं?’’ मैंने भैयाजी से कई।

‘‘सई कै रईं बिन्ना! मनो हम तो जे सोच रए के जो ऊ टेम पे मोबाईल होतो तो का होतो। मनो ऊ टेम पे राजा के संगे लड़ाई पे जाबे वारो कोनऊं कवि के लिंगे मोबाईल होता तो बा लड़ाई के मैदान में जा के राजा जू से जेई कैतो के महाराज हमाओ फोन आ गओ सो हम देख ने पाए के आपने बे सिपाइयन को गलो कैसे काटो, सो दो-चार के औ काट के दिखा देओ, ने तो हम का लिखबी के आपने कैसे काटो?’’ भैयाजी बोले।

‘‘हऔ, औ जो राजा जू के लिंगे मोबाईल होतो तो बे जवाब देते के हमाओ सोई फोन बजन लगो रओ सो हम अबे काट कां पाए। अब तुम ध्यान से देखियो हम दुस्मन के सिपाइयों को गला काटबे जा रए।’’ मैंने हंस के कई।

‘‘सो इत्तई पे काए, बे दुस्मन के सिपाई का ऊंसई बिगैर फोन के उते लड़बे आऊते? उने बी तो अपनी रील बना के सोसल मिडिया पे पोस्ट करने परती। सो बे राजा जू से कैते के महाराज, हमाओ गलो काटने होए सो काट लइयो, मनो पैले हमें जा लड़ाई के मैदान पे तलवार के संग वारी अपनी रील पोस्ट कर लेन देओ।’’ भैयाजी हंस के बोले।

‘‘बा तो सब ठीक आए भैयाजी, मनो जे आप सोचो के संत प्रणनाथ जू ने महाराज छत्रसाल खों बुंदेलखंड में हीरा होबे की बताई रई। उन्ने कई रई के-

छत्ता तेरे राज में धक-धक धरती होय

जित-जित घोड़ा पग धरे, उत-उत हीरा होय।।

मनो जो ऊ टेम पे मोबाईल और गूगल गुरू होतो तो कोनऊं बी एआई से पूछ के बता देतो के हीरा कां निकरहे।’’मैंने भैयाजी से कई।

‘‘जे एआई की तुमने भली कई। गूगल पे एआई बताऊतो जरूर मनो संगे जे औ कै देतो के जरूरी नई के एआई की जानकारी सई होए, सो औ सोर्सन से सोई पतो कर लेओ।’’ भैयाजी बोले।

‘‘हऔ, जा तो आपने सई कई के जो बे एआई से पूछ के सई ने बता पाते तो उनको गलो कटनो तै रैतो। जा खतरा तो रैतो। पर हो सकत के ऊ टेम पे बी व्हाटअप यूनवर्सिटी चल रई होती औ राजा जू उतई की नौलेज पे टिके होते तो कोनऊं खतरा ने रैतो।’’ मैंने सोई कई।

‘‘तनक जे सोई सोचो के ऊ टेम पे चंदबरदाई ने बिना फीता से नप्पे बता दओ रओ के -

चार बांस, चौबीस गज, अंगुल अष्ट प्रमाण

ता ऊप्पर सुल्तान है, मत चूक्के चौहान।।

औ पिरथवी राज चौहान बी ऐसे के उने दिखा नई रओ तो फेर बी बे सई नाप समझ गए औ सई निसाना पे तीर चला दओ। आज काल के मोड़ा तो सीदी लकीर नईं खेंच सकत। औ मोबाईल के कैल्कुलेटर के बिगैर पिज्जा-बर्गर को हिसाब नईं कर सकत।’’ भैयाजी बोले।

‘‘बा सब तो ठीक आए भैयाजी, मैं जा सोस रई के जो ऊ टेम पे मोबाईल होतो तो का फेर बी ऊ टेम के साहित्य को वीरगाथा काल कओ जातो?’’ मैंने भैयाजी से पूछी।

‘‘का पतो? तब ऊ टेम पे इत्ती नोंनी कबित्त कोऊ लिखई ने पातो। काए से के बे तो चार लेन लिखते और लाईक, कमेंट जुटात-जुटात पूरो टेम निकार देते। भला भूषण घांई ऐसे कबित्त कां लिख पाते के- 

बाने फहराने घहराने घंटा गजन के 

नाहिं ठहराने राव राजे देस देसन के

नग भहराने ग्राम नगर पराने सुनि

बाजत निसाने शिवराज जू नरेश के

इत्तो अच्छो कबित्त बोई लिख सकत आए जोन ने लड़ाई अपनी सगी आंखन से देखी होए। बा टीवी चैनल की गप्पे देख के ऐसो कबित्त थोड़े रचो जा सकत आए।’’ भैयाजी बोले।

‘‘सई कई आपने भैयाजी! जो बाने फहराने घहराने टेम पे मोबाईल होतो तो वीरगाथा काल सोई आजकाल की घांईं रील काल बन के रै जातो। अच्छो रओ के बाने फहराने घहराने टेम पे जा मोबाईल को ईजाद ने भओ रओ। कम से कम राजा हरें चैन से लड़ तो पाए। ने तो बे सोई ट्रोल-ट्रोल खेलत रैते औ फेर जब लड़बे की सोसतें तो कवि हरें पैलई कैते के पैले हमें कोनऊं बड़ों वारो सम्मान, पुरस्कार देओ सो संगे चलबी, ने तो तुम जानो औ तुमाओ काम जाने।’’ मैंने कई।

‘‘सई में बिन्ना, अच्छो रओ के बा वीरगाथा काल वारे टेम पे मोबाईल ने चलो रओ। ने तो हिन्दी साहित्य को इतिहास रील साहित्य को इतिहास बन के रै जातो।’’ भैयाजी हंसत भए बोले।

मनो जा चिंता हंसबे की नोंईं सोचबे वारी आए। 

बाकी बतकाव हती सो बढ़ी गई, हड़ियां हती सो चढ़ा गई। अब अगले हप्ता करबी बतकाव तब तक लौं जेई की जुगाली करो। मनो सोचियो जरूर के जो वीरगाथा काल में मोबाईल होतो तो का ऊंसई भओ रैतो जैसी मैं औ भैयाजी सोंस रए हते? जो आपके लाने कछू औ समझ परे सो बतइयो। जै राम जी की! 

 ---------------------------

बुंदेली कॉलम | बतकाव बिन्ना की | डॉ (सुश्री) शरद सिंह | प्रवीण प्रभात

---------------------------

#बतकावबिन्नाकी #डॉसुश्रीशरदसिंह #बुंदेली #batkavbinnaki  #bundeli  #DrMissSharadSingh #बुंदेलीकॉलम  #bundelicolumn #प्रवीणप्रभात #praveenprabhat