टाॅपिक एक्सपर्ट
अब तो दारू से तौबा करो भैया हरों
- डॉ (सुश्री) शरद सिंह
जा खबर सबई ने पढ़ी औ सबई ने सुनी के अपने सागर जिला में जहरीली दारू पी के मुतके आदमी मर गए औ अबे मरत जा रए। ऊपे मुतके बीमार डरे। कोऊ-कोऊ घरे तो जे दसा सुनी के उते कोऊ कमाबे वारों ने बचो। जेई लाने तो कई जात आए के पैले आदमी दारू पीबो सुरू करत आए, फेर दारू आदमी खों पी जात आए। अखीर जहरीली दारू पी गई मुतके आदमियन खों। अब ईकी जांच-पड़ताल हो रई के इत्ती मौतन को जिम्मेवार को आए? चलो, अपन सोई पड़ताल कर लइए! काए से के मरबे वारन के पांछू रै गए उनके मोड़ा-मोड़ी को रोबो देखो-सुनो नईं जा रओ।
सो ध्यान से पढ़ियो! ताजा बात तो जेई पता परी आए के जोन कारीगर दारू बनाउत्तो बा तीरथ करबे खों चलो गओ सो ऊके बदले कोनऊं अनारी ने दारू बनाई जीसे बा बिगर गई औ जहरीली बन गई। लेओ, सुनबे में कित्ती जरा सी बात आए। मनो इत्तई में तो मुतके जनों को हो गओ राम नाम सत्त। बाकी हम तो जेई जानत आएं के सबसे बड़े दोषी बे दारू पीबे वारे आएं। माफ करियो, काए से मरबे वारे औ कष्ट में रैबे वारों के दोष नईं गिनाए जात, मनो जे तो माननेई परहे के जो बे दारूखोरी ने करते तो उनकी जा दसा ने होती। जे तो तै आए के सरकार दारूबंदी कभऊं ने करहे काए से ऊको मोटो रेवेन्यू मिलत आए। दारू बनावे वारन से गलती भई मनो उन्ने कट्टा दता के तो ने पिलाई रई। सो बचे कोन? बेई दारूखोर जोन अपने परिवार के हींसा को पइसा दारू में उड़ात रए औ अब अपने बेई परिवार खों अकेलो कर गए। सो, भैया हरों अब तो जाग जाओ औ दारूखोरी से तौबा कर लेओ। काए से के दारू आप ओरन की जिनगी औ परिवार से बड़ी कभऊं नईं हो सकत। सो, भैया हरों बिनती आए के चाए खुसी होए, चाए गम, दारू के लाने ने उठें कदम!
----------------------------
Thank you Patrika 🙏
Thank you Dear Reshu Jain 🙏
----------------------------
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #बुंदेलीकॉलम #patrika #rajsthanpatrika #topicexpert #बुंदेली
No comments:
Post a Comment