टॉपिक एक्सपर्ट | पत्रिका | जबे राहतगढ़ वाटरफॉल में राहत ने मिली | डॉ (सुश्री) शरद सिंह

पत्रिका | टॉपिक एक्सपर्ट | डॉ (सुश्री) शरद सिंह | बुंदेली में

..................................

टाॅपिक एक्सपर्ट

जबे राहतगढ़ वाटरफॉल में राहत ने मिली

- डॉ (सुश्री) शरद सिंह

        दो-चार दिनां पैले हम ओरन ने सोची के जे बरसात कढ़ जाए ईसे पैले राहतगढ़ को वाटरफॉल देख आओ जाए। पर की सिल बी गए रए, सो ई सालें बी प्रोग्राम बन गओ। जे बात अलग के ऊ दिनां धूप कढ़ी रई औ हम ओरें भुट्टा से भुनत रए। मनो ईसे बड़ी पीरा भई उते की दसा देख के। ऊको टूरिस्ट प्लेस घांईं सजाओ-संवारो जा रओ आए, ई लाने उते बच्चन के लाने झूला, घिसलपट्टी बना दई गई आए। सबई के लाने कई ठइयां छतरियां आएं, जां छायरे में सुस्ताओ जा सकत आए।

     मनो हमें जा देख के पीरा भई के वहां जां तां नमकीन, कुरकुरे औ चिप्स हरों की खाली पन्नियां बगरी हतीं। उते मुतके गाय-बैलवा सोई हते। जोन ने जगां-जगां गोबर कर रखो तो। सो, उते बड़ी गंदगी मची हती। छतरियां में सोई गऊ माता आरामफरमा रईं हतीं। अब उते वाटरफॉल के काफी पैले नाको बना के परहेड 10/- की टिकट काटी जाती आए। मनो आवारा पशुअन के लाने फ्री एंट्री आए। उने कोनऊं रोक टोंक नोंई। हमें सो जे देख के बी पीरा भई के उते घूमबे वारे खुदई जां तां कचरा मेंक रए हते। उने टोकबे वारो उते कोऊ ने हतो। बा टूरिस्ट प्लेस आए, सो जो कोनऊं कभऊं बाहर वारो आ जाए, तो का सोचहे? औ खुदई सोचो के आप  चाए कित्तो पोज बना लेओ, उते की हर फोटू में संगे कचरा औ गोबर दिखात रै तो हो गई फोटू की ऐसी कम तैसी। ऐसे में राहतगढ़ वाटरफॉल देखत समै राहत कां से मिलहे? सो, उते घूमबेवारो ऐसो कचरा ने फैलाओ करे!औ प्रशासनवारो ऊ जांगा को तो आवारा पशुअन से मुक्त करो!

-----------------------------

Thank you Patrika 🙏

Thank you Dear Reshu Jain 🙏

#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका  #patrika #rajsthanpatrika #सागर  #topicexpert #बुंदेली #बुंदेलीकॉलम