पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
..................................
टाॅपिक एक्सपर्ट
ने कछू, अबई बिसर जाने सबई खों,
अब ज्यों को त्यौं रे है सब कछु
- डॉ (सुश्री) शरद सिंह
नौ ठईयां बच्चा हरें मर गए दीवार में दब के, सो सबई खों भौतई दुख भओ। कोनऊं के संगे ऐसो ने होय, जेई सबने सोची। मनो कछू लोग, सो जेई पढ़ के हमें टोंकहें के दीवार गिरे कुल्ल दिनां हो गए औ आप उतई अटकी हो। ऊके बाद सो विनेश फोगाट खों ओलंपिक से बाहरे कर दओ गओ। औ बा खबर सोई पुरानी भई जा रई। औ आपके लाने अबे लौं बे बच्चा औ दीवार दिखा रई? सो, अब का करो जाए! हमाए जी की पीरा कोनऊं टीवी की खबर नोंई के चार दिनां में बा टीआरपी जोग ने रए। खैर, मनो पीरा तो जे बात की बी हो रई के ई घटना के बाद सबई जांगा गिरबे वारे घरों औ दीवारों की चिन्हारी कर के उने गिराबे की कारवाई तेजी के करी जाने चाइएती। मनो, चिन्हारी वारे बी जानत आएं के चार दिनां में सबई बिसर जैहैं। जे सोचबे में गलती उनकी बी नईयां। काय से के ऐसोई होत आए बरहमेस। जेई लाने तो सबई तरफी अत्तें मची रैत आएं।
तनक सरकारी अस्पतालन खों देख लेओ। कऊं छतें टपक रईं, सो कऊं जच्चा-बच्चा के लाने जांगा नईयां। फरश पे गद्दा डार के एक गद्दा पे दो-दो जच्चा-बच्चा सोआ दए गए। बा तो एक स्याने फोटूग्राफर ने उन ओरन की फोटू खैंच लई, ने तो सोआबे वारे मेट जाते। मनो कोऊ काय के लाने सुदरे? गड़बड़ करबे वारे जानत आएं के, ने कछू, कां का भओ अबई बिसर जाने सबई खों। सो, ऐसो ने करो, सबई जने कछू तो याद राखो, जीसे कछु सुदर सके।
-----------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #PatrikaNews #rajsthanpatrika #सागर #topicexpert #बुंदेली
No comments:
Post a Comment