टॉपिक एक्सपर्ट | पत्रिका | ई समाज खों रावन मुक्त कराने है | डॉ (सुश्री) शरद सिंह

पत्रिका | टॉपिक एक्सपर्ट | डॉ (सुश्री) शरद सिंह | बुंदेली में

..................................

टाॅपिक एक्सपर्ट

ई समाज खों रावन मुक्त कराने है

- डॉ (सुश्री) शरद सिंह

   कभऊं सोचों आप ओरन ने के पैले जमाने में, मने त्रेताजुग में एकई रावन हतो, जबके आज के समै में मुतके रावन ई अपने समाज में फिर रये। ऊ समै के रावन ने सीता मैया को अपहरण करो रओ, मनो आज के रावन तीन बरस की लोहरी मोड़ी से ले के अस्सी बरस की नार खों नई छोड़ रये। जोन बा वारो रावण जो ई टेम पे होतो तो बा सोई सरमा जातो औ कैन लगतो के ‘हमाए नांव पे इत्ती अत्ते ने करो!’ आज के रावन हरों ने तो मनो जानवरन खों पांछू छोड़ दओ। सो, जो जे अपन ओरें हर बरस दसेरा पे रावन खों मारत आएं, जेई के संगे बे आदतन खों सोई मारो चाइए जोन के कारण आज रावन बढ़त जा राये। जैसे कोनऊं के संगे गलत ब्यौहार ने करो जाए, कोनऊं खों धोखो ने दओ जाए, कोनऊं टाईप की हिंसा ने करी जाये। हऔ, औ ईके संगे जे सोई के जो कोनऊं तकलीफ में होय सो ऊकी मदद करी जाए। आपई सोचों के कोऊ बिटिया अकेली जा रई होये औ कोऊ बदमास ऊको छेड़न लगे सो हमें बा बदमास को ऐसो करबे से रोको चाइये। औ जो रोकबे में तनक डर लगे तो तुरतईं 100 नंबर पे पुलिस को खबर करो चाइये। काए से के पब्लिक जाग जाए सो फेर कोनऊं रावन टिक नईं सकत।

      सो, ई बेर की दसेरा पे प्रन करो के अपने ई समाज खों रावन मुक्त कराने है। ऐसो समाज रये के जोन में लुगाईं, बिटियां बिगैर डराये कऊं बी आ-जा सकें। सो जेई उमींद के संगे सबईं को दसेरा की राम-राम पौंचे! 

-------------------------

Thank you Patrika 🙏

Thank you Dear Reshu Jain 🙏

#टॉपिकएक्सपर्ट #डॉसुश्रीशरदसिंह  #DrMissSharadSingh #पत्रिका  #patrika #rajsthanpatrika #सागर  #topicexpert  #बुंदेली #बुंदेलीकॉलम

#दसेरा #दशहरा #दशहरा2024 #dussehra #dussehra2024 #रावण #ravan