पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
टाॅपिक एक्सपर्ट
भईया हमें तो दो बातें समझ परीं
- डॉ (सुश्री) शरद सिंह
कभऊं-कभऊं बुद्धि के दोरे खुदई खुल जात आएं। जेई हमाए संगे भओ औ हमें दो बातें समझ परीं। का भऔ के नवरातें चल रईं आएं सो हमने सोची के मातारानी के दरसन कर लए जाएं। सो, सुनवाहा जाने को पिलान बनो। बा आए तो बेगमगंज में पर सागर के बाडर पे। सो, हम चल परे सुनवाहा के लाने। लखनादौन वारी फोरलेन से उतरतई संगे बिलहरा रोड पकरी। खुरई थांवरी, सहजपुरी होते भए सुनवाहा की गैल । मनो, बात गैल की ही आए। पैली बात तो जे समझ परी के अपने सहर में जोन टाईप से रोजीना सड़कें खुदत रैत आएं, सो लगत आए के कऊं कछु ठीक नईं हो रओ, मनो उते की रोड देख के आंखें जुड़ा गईं। इत्ती नोनी रोड की का कओ जाए। मने गांव, तहसील में जाए से पतो परत आए के बिकास को काम खूब करो जा रओ।
दूसरी बात जे समझ परी के उते गांव वारे बनो बनाओ काम बिगारत नईयां। पूछो कैसे? बा ऐसे के अपने इते भाग्योदय अस्पताल के इते फ्लाईओवर बनो। ऊके कनारे लोहा के जंगला लगाए गए। सो, कछु भैया हरें बे जंगला को लोहो ई काट ले गए। जबके उते गांव में रोड के साईन औ इंडीकेटर्स लौं सई सलामत लगे दिखा रए हते। रोड की दोनों तरफी खेत हते। ने तो तनकऊं कचड़ा औ ने गंदगी। भौतई साफ-सुथरो। सो, हमें जेई दो बातें समझ परीं के अकेली सहर में देख के जे नई सोचो चाइए के सरकार कछू नईं करत। औ दूसरी बात जे के गांव वारे ने तो अतिक्रमण करत आएं औ ने बनाई गई चीजन खों नुकसान पौंचात आएं। हमाई कई पे भरोसो ने होए तो खुदई जा के देख लेओ। मनो भड़यां तो सब जागां होत आएं पर सहर घांईं नोईं। इते तो प्रसासन औ पब्लिक एक-सी ठैरी, तनक तुम- तनक हम। रिजल्ट भओ निल बटा सन्नटा।
------------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment