टॉपिक एक्सपर्ट | पत्रिका | आम को पना पियो औ टैक्स भरो | डॉ (सुश्री) शरद सिंह

पत्रिका | टॉपिक एक्सपर्ट | डॉ (सुश्री) शरद सिंह | बुंदेली में

टॉपिक एक्सपर्ट

आम को पना पियो औ टैक्स भरो

- डॉ (सुश्री) शरद सिंह

       कां तो हम चौराए पे छायरी के लाने बर्रया रये हते औ इते घाम में तपा-तपा के भुंटा से भून दये जा रए। बा बी ऐसो वारो भुंटा जो भुंजत टेम चटर-पटर लौं नईं कर सकत। इते सूरज देवता मूड़ पे ठाड़े हो के तांडव कर रये औ उते 30 अप्रैल तक को टेम दओ गओ आए टैक्स भरबे के लाने। प्रापर्टी को, पानी को, कचड़ा को। मने सबरे टैक्स। एक तरफी एनाउंसमेंट करा रये के दुफारी को 12 से 03 घरे से बायरे ने कढ़ो औ दूसरी तरफी दुफारी 11 से संझा 5 को टेम दे रये टैक्स भरबे के लाने। गजबई हो रओ, रामधई ! बाकी गजब की का कयें? प्रापर्टी टैक्स सो चलो, अपने घरे रै रये सो कोनऊं बात नईं। सई आए। कचरागाड़ी रोज की आ रई, सो ऊको टैक्स बी सई कहानो। मनो पानी को टैक्स में सो प्रानई निकार लये। गई एक साल को जो पानी को पइसा ने भर पाओ सो ऊपे पूरो 780 रुपैया पेनाल्टी ठोंक दई। जबके गई साल में राजघाट औ टाटा की कबड्डी खिलत रई। कभऊं पाईपें टूटत रईं, तो कभऊं नई लाईनें डलत रईं। मने पानी तो पूरो मिलो नईं, बाकी पईसा वसूले जा रए। 

        होने को तो जो होने चाइए रओ के मकरोनिया वारो वसूली कैम्प सुभै सात-साढ़े सात से दुफारी के 12-12:30 बजे लौं लगाओ जातो। पर ऐसो करो नई गओ। जबरा मारे औ रोन न दे घांई चल रओ। सो, मनो अब करो का जाए? जेई करो भैया-बैन हरों के आम को पना पियो औ टैक्स भरो। काए से के जे गरमी औ घाम की खुदई खों सोचने परहे।

------------------------------

Thank you Patrika 🙏

Thank you Dear Reshu Jain 🙏

#टॉपिकएक्सपर्ट  #डॉसुश्रीशरदसिंह  #DrMissSharadSingh #पत्रिका  #patrika #rajsthanpatrika  #सागर  #topicexpert  #बुंदेली #बुंदेलीकॉलम